បង្រ្កាបករណីជួញដូរគ្រឿងញៀន២គោលដៅផ្សេងគ្នា កម្លាំងជំនាញរឹបអូសគ្រឿងញៀនបាន២​គីឡូក្រាម

កម្លាំងជំនាញនៃមន្ទីរប្រឆាំងបទល្មើសគ្រឿងញៀន(ក៤) សហការជាមួយកម្លាំងស្នងការដ្ឋានរាជធានីភ្នំពេញចុះស្រាវជ្រាវស៊ើបអង្កេតរហូតឈានដល់បង្រ្កាបករណីរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀននៅ២​គោល​ដៅផ្សេងគ្នា ឃាត់ខ្លួនមនុស្ស២នាក់ និងរឹបអូសបានគ្រឿងញៀន២គីឡូក្រាម។

ប្រតិបត្តិការនេះបានធ្វើឡើងកាលពីថ្ងៃទី៤ ខែកក្កដា ឆ្នាំ២០២៤ វេលាម៉ោង១៧និង៣០នាទី ដោយគោលដៅទី១ ស្ថិតនៅលើផ្លូវបេតុង ខាងក្រោយផ្សារប៉េសេ ភូមិត្នោតជ្រុំ សង្កាត់បឹងទំពន់ខណ្ឌមានជ័យ រាជធានីភ្នំពេញ។ និងគោលដៅទី២ ស្ថិតនៅសំណង់មិនរៀបរយ ភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

ក្នុងប្រតិបត្តិការកម្លាំងជំនាញនៃមន្ទីរគ្រឿងញៀនបានធ្វើការឃាត់ខ្លួនជនសង្ស័យចំនួន២នាក់ឈ្មោះ លាង ស្រីពេញ ភេទស្រី អាយុ៣៧ឆ្នាំ ជនជាតិខ្មែរ និងឈ្មោះ អ៊ុយ ណារី ភេទស្រី អាយុ៣៤ឆ្នាំ ជនជាតិខ្មែរ ដកហូតគ្រឿងញៀនប្រភេទមេតំហ្វេតាមីន(ICE) ទម្ងន់ ២០៧៨,៤២ក្រាម និងគ្រឿងញៀនប្រភេទកេតាមីន (Ketamine) ទម្ងន់ ១៩៥,៣៦ក្រាម។ វត្ថុតាងគ្រឿងញៀមសរុបចំនួន២ គីឡូក្រ ២៧៣,៧៨ក្រាម។

ជនសង្ស័យរួមទាំងវត្ថុតាងត្រូវបានកម្លាំងជំនាញកសាងសំណុំរឿងបញ្ជូនខ្លួនទៅសាលាដំបូងរាជធានីភ្នំពេញដើម្បីចាត់ការតាមនីតិវិធី៕

អត្ថបទ៖ ម៉េង