លោក គួច ចំរើន៖ ពុំមានការបិទមិនឲ្យហែទីង​មោងនោះទេ តែស្នើសុំរៀបចំឲ្យមានសណ្ដាប់​ធ្នាប់ល្អ

បន្ទាប់មានការបញ្ចេញមតិពីមហាជននៅលើបណ្ដាងសង្គមពាក់ព័ន្ធនឹងការបិទមិនឲ្យមានការដង្ហែទីងមោងនៅតាមផ្លូវសាធារណៈដែលបង្កឲ្យភាពអសន្តិសុខ នៅព្រឹកថ្ងៃទី១២កក្កដា នេះ លោក គួច ចំរើន អភិបាលនៃគណអភិបាលខេត្តកណ្ដាលបានបញ្ជាក់ថា ពុំមានការបិទទេ ហើយស្នើសុំអោយរៀបចំដោយមានសណ្តាប់ធ្នាប់ល្អ។ ជាមួយគ្នានេះ​ លោក គួច ចំរើន ក៏នឹងត្រៀមជួបផ្ទាល់ជាមួយក្រុមសជិកទីងមោងនៅពេលខាងមុខផងដែរ។

តាមរយៈសំណេរនៅលើទំព័រហ្វេសប៊ុកផ្លូវការរបស់លោក គូច ចំរើន បានសរសេរថា «ខ្ញុំបានឃើញការផ្សព្វផ្សាយអំពី ទីងមោង ថាត្រូវបានបិទ។ ខ្ញុំសូមបញ្ជាក់ថា ពុំមានការបិទទេ ហើយស្នើសុំអោយរៀបចំដោយមានសណ្តាប់ធ្នាប់ល្អ រក្សាបាន គុណតម្លៃសិល្បៈវប្បធម៌ខ្មែរយើង។ ខ្ញុំនឹងជួបជាមួយបងប្អូនផ្ទាល់ នៅពេលខាងមុខ»។

សូមបញ្ជាក់ថា នៅលើបណ្ដាញាសង្គមនាពេលថ្មីៗនេះ មានការលើកឡើងពីការបិទមិនឲ្យមានការដង្ហែទីងមោងនៅតាមផ្លូវសាធារណៈដែលធ្វើឲ្យប៉ះពាល់ដល់សណ្ដាប់ធ្នាប់ និងបង្កភាពអន្តិសុខសាធារណៈ។ តាមការលើកឡើងមួយចំនួន ការដង្ហែទីងមោងគឺជាទំនៀមទម្លាប់ប្រពៃណីពីបុរាណរបស់ប្រជាពលរដ្ឋអ្នកស្រុកស្អាង ខេត្តកណ្ដាល៕

អត្ថបទ៖ សុខុម