អភិបាលខណ្ឌឬស្សីកែវ ស្នើឲ្យអ្នកសាងសង់សំណង់រំលោភលើប្រឡាយកាំកូ ត្រូវរុះរើចេញ ជៀសវាងប្រឈមមុខផ្លូវច្បាប់

អភិបាលខណ្ឌឬស្សីកែវបានបន្តយកចិត្តទុកដាក់ពីបញ្ហាសណ្ដាប់ធ្នាប់បរិស្ថានអនាម័យ ក្នុងមូលដ្ឋានជាប់ជាប្រចាំ ជាពិសេសបញ្ហារំដោះទឹក ការស្ដារប្រឡាយ ដាក់លូ ពីការជន់លិចក្នុងមូលដ្ឋាន។

ជាក់ស្ដែង នារសៀលថ្ងៃអាទិត្យ ទី១៤ ខែកក្កដា ឆ្នាំ២០២៤ លោក ជិន ប៊ុនធឿន អភិបាលខណ្ឌប្ញស្សីកែវ បានដឹក​នាំ​មន្ដ្រីជំនាញពាក់ព័ន្ធចុះត្រួតពិនិត្យករណីសំណង់សង់រំលោភលើប្រឡាយកាំកូ ដែលត្រូវមានចំណាត់ការជាបន្ទាន់ និងស្នើឲ្យម្ចាស់ទីតាំងរុះរើចេញជាដាច់ខាត ក្នុងករណីមិនរុះរើត្រូវប្រឈមជាមួយផ្លូវច្បាប់។

សូមបញ្ជាក់ផងដែរថា ប្រឡាយនេះ មានប្រវែង១៤៥ម៉ែត្រ ស្ថិតក្នុងភូមិពង្សពាយ សង្កាត់ទួលសង្កែទី២ អាចរំដោះទឹកហូរពីព្រែកអូរវែង សង្កាត់ទួលសង្កែទី១ កាត់ផ្លូវ៥៩៨ ចូលមកប្រឡាយកាំកូ រួចបន្តហូរទៅស្ថានីយ៍រំដោះទឹកបឹងពង្សពាយ៕

អត្ថបទ៖ សុភា