អាជ្ញាធរសង្កាត់ចោមចៅទី៣ ចុះពិនិត្យផ្លូវលំមួយខ្សែប្រវែង៦០០ម៉ែត្រគ្រោងស្ថាបនាជាផ្លូវបេតុងឆ្អឹងដែក

លោក​ វ៉ា​ សាវឿន​ ចៅសង្កាត់ចោមចៅទី៣​ និងលោក សុទ្ធ​ សុជាតិ​ ចៅសង្កាត់រងទី១​ រួមទាំងក្រុមការងារ​ នៅព្រឹកថ្ងៃទី១៥ ខែកក្កដា ឆ្នាំ២០២៤នេះ បានចុះពិនិត្យផ្លូវលំមួយខ្សែក្នុងភូមិ ព្រៃទា១ ដែលរងការខូចខាទ្រុឌទ្រោមពិបាកដល់បងប្អូនប្រជាពលរដ្ឋប្រកបរបររកស៊ី​ ការធ្វើដំណើរទាំងរដូវប្រាំង និងរដូវវស្សា។

លោក វ៉ា សាវឿន ចៅសង្កាត់ចោមចៅទី៣ បានឱ្យដឹងថា ដោយមើលឃើញនូវទុក្ខលំបាករបស់ប្រជាពលរដ្ឋ ទាំងការធ្វើដំណើរ និងប្រកបមុខរបររកស៊ី ទើបលោកដឹកនាំក្រុមការងារចុះពិនិត្យផ្លូវលំខាងលើ​ និងគ្រោងស្ថាបនាជាផ្លូវបេតុងឆ្អឹងដែកឆាប់ៗនេះ។

លោក​ចៅសង្កាត់បានបន្តថា​ ផ្លូវដែលគ្រោងនឹងស្ថាបនាជាផ្លូវបេតុងឆ្អឹងដែកនៅពេលឆាប់ៗខាងមុខនេះ​ មានប្រវែង​៦០០ម៉ែត្រ ទទឹង៤.៥ម៉ែត្រ កំរាស់១.៥តឹក​ ដោយប្រេីប្រាស់ថិវិការមូលនីធិអភិវឌ្ឍន៍សាលាសង្កាត់ចោមចៅទី៣​ ឆ្នាំ២០២៤​ ។ លោកបញ្ជាក់បន្ថែមថា​ ផ្លូវនេះតភ្ជាប់ពីផ្លូវបេតុងឆ្អឹងដែកមួយខ្សែប្រវែង៧០០ម៉ែត្រ​ ទទឹង៤ម៉ែត្រ​ ដែលសាលាសង្កាត់ទេីបតែស្ថាបនាហេីយរួចរាល់​ កាលពីខែឧសភា​ ឆ្នាំ២០២៤នេះ។ លោកបានបន្តទៀតថា ការស្ថាបនាផ្លូវបេតុងខាងលើដើម្បីឱ្យប្រជាពលរដ្ឋងាយស្រួលក្នុងការធ្វើដំណើរ និងប្រកបមុខរបររកស៊ីផ្សេងៗ ដែលពួកគាត់រស់នៅតាមបណ្តោយផ្លូវនេះ និងអ្នកដែលធ្វើដំណើរឆ្លងកាត់។

ជាមួយគ្នានេះផងដែរ​ ប្រជាពលរដ្ឋសំណែងការត្រេកអរសប្បាយចិត្តយ៉ាងខ្លាំង និងមានភាពកក់ក្តៅ ខណៈអាជ្ញាធរ​តែងតែយល់ពីទុក្ខលំបាកប្រជាពលរដ្ឋក្នុងមូលដ្ឋានក្រោមការដឹកនាំបំពេញកាតព្វកិច្ចបំរេីប្រជាពលរដ្ឋ។ រដ្ឋបាលសង្កាត់ចោមចៅទី៣ ក៏សូមអរគុណដល់ប្រជាពលរដ្ឋដែលរស់នៅតាមបណ្តោយផ្លូវខាងលើដែលបានជួយសហការ ការស្ថាបនាផ្លូវនេះដើម្បីមានភាពងាយស្រួលទាំងអស់គ្នា៕

អត្ថបទ៖ សុខា