ផ្លូវតភ្ជាប់ពីផ្លូវ៦០ម៉ែត្រ ទៅសង្កាត់ជើងឯកផ្ដល់ភាពងាយស្រួលប្រើរយៈពេលខ្លីឆាប់រហ័ស

ផ្លូវកៅស៊ូថ្មីមួយខ្សែដែលមានប្រវែង៤គីឡូម៉ែត្រ តភ្ជាប់ពីផ្លូវ៦០ម៉ែត្រ ទៅសង្កាត់ជើងឯកត្រូវបានដាក់ឲ្យប្រជាពលរដ្ឋប្រើប្រាស់ ផ្ដល់ភាពងាយស្រួលក្នុងការធ្វើដំណើរ និងឆាប់រហ័ស។ ផ្លូវមួយខ្សែនេះបានតភ្ជាប់ពីផ្លូវ៦០ម៉ែត្រ ចំណុចស្តុបផ្សារទំនើបអុីអន៣ ទៅកាន់សង្កាត់ជើងឯក ខណ្ឌដង្កោរ ដែលបានផ្តល់ភាពងាយស្រួលដល់ប្រជាពលរដ្ឋសម្រាប់ធើ្វដំណើរ និងប្រកបមុខរបរអាជីវកម្មតូចធំផ្សេងៗ។

លោក ភ័ក្ដី ជាអ្នកដឹកត្រកួនយកទៅលក់ដែលតែងធ្វើដំណើរឆ្លងកាត់តាមបណ្ដោយផ្លូវថ្មីនេះបានបង្ហាញអារម្មណ៍សប្បាយរីករាយនៅពេលដែលមានផ្លូវថ្មីស្រួលធ្វើដំណើរ ហើយមិនចំណាយពេលយូរដូចមុន។ លោកថា ពីមុនបើចង់ធ្វើដំណើរពីជើងឯកមកផ្លូវ៦០ម៉ែត្រត្រូវជិះវាងចំណាយពេលយូរ តែពេលមានផ្លូវនេះលោកជិះតែ២ ឬ៣នាទីប៉ុណ្ណោះ។លោក ភ័ក្ដី បន្តថា ផ្លូវថ្មីនេះមិនត្រឹមតែផ្ដល់ភាពងាយស្រួលក្នុងការធ្វើដំណើរប៉ុណ្ណោះទេ គឺវាអាចបញ្ចៀសការកកស្ទះចរាចរណ៍ ហើយក៏មានប្រជាពលរដ្ឋមួយចំនួនមកអង្គុយលេងស្រូបយកខ្សល់អាកាសពេលសម្រាកពីការងារផងដែរ។

គួរបញ្ជាក់ថា ក្រោមដឹកនាំយកចិត្តទុកដាក់ពីប្រមុខរាជរដ្ឋាភិបាល ជាពិសេសសម្តេចមហាបរវធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា តែងផ្តល់នូវហេដ្ឋារចនាសម្ព័ន្ធជាបន្តបន្ទាប់គ្រប់វិស័យ៕

អត្ថបទ និងរូបភាព៖ ម៉េង និង រដ្ឋា