សន្តិសុខសង្គម

យុវជនម្នាក់ ជិះម៉ូតូបញ្ច្រាសផ្លូវ ត្រូវរថយន្តមិនស្គាល់ម៉ាកបុកពេញទំហឹង បោកក្បាលស្លាប់យ៉ាងអាណោចអាធ័ម

បានផុស

៧ ខែ មុន

នៅ

ថ្ងៃសុក្រ ១៩ កក្កដា ២០២៤

ដោយ

យុវជនម្នាក់ បានស្លាប់បាត់បង់ជីវិតនៅនឹងកន្លែងកើតហេតុភ្លាមៗ បន្ទាប់ពីជិះម៉ូតូបញ្ច្រាសផ្លូវ ត្រូវរថយន្តមួយគ្រឿង មិនស្គាល់ម៉ាក បើកមកលឿន បុកពេញទំហឹង ប៉ើងទៅមុខជាច្រើនម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍គ្រោះថ្នាក់ចរាចរណ៍ខាងលើបង្កការភ្ញាក់ផ្អើល កាលពីវេលាម៉ោង ៤ ទៀបភ្លឺ ឈានចូលថ្ងៃទី ១៩ ខែកក្កដា ឆ្នាំ ២០២៤ ស្ថិតនៅលើផ្លូវសហព័ន្ធរុស្ស៊ី សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។

ជនរងគ្រោះ(សព)មានឈ្មោះ សុខ ពិសិដ្ឋ ភេទប្រុស អាយុ ២៥ ឆ្នាំ រស់នៅភូមិព្រៃប្រាសី ឃុំដៃកំពក ស្រុកព្រះស្តេច ខេត្តព្រៃវែង។

តាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុគេសង្កេតឃើញយុវជនរងគ្រោះបានជិះម៉ូតូម៉ាកស៊ុយស៊ូគីនិច ពណ៌ស មួយគ្រឿង ពាក់ស្លាកលេខភ្នំពេញ 1HY-6960 ជិះតាមបណ្ដោយផ្លូវសហព័ន្ធរុស្ស៊ី ទិសដៅបញ្ច្រាសផ្លូវ ពីត្បូងទៅជើង ក្នុងល្បឿនលឿន ស្របពេលនោះក៏មានរថយន្តបង្កមិនស្គាល់ម៉ាក បើកបរដោយបុរសម្នាក់ ធ្វើដំណើរស្របផ្លូវពីជើងមកត្បូង ល្បឿនលឿន បុកម៉ូតូជនរងគ្រោះ ប៉ើងទៅមុខជាច្រើនម៉ែត្រ បណ្ដាលឲ្យយុវជនជាម្ចាស់ម៉ូតូ បោកក្បាលនៅនឹងផ្លូវស្លាប់យ៉ាងរន្ធត់។ ចំណែករថយន្តបង្កមិនព្រមឈប់នោះទេ បានបន្តល្បឿនបើករត់ទាំងបែកកង់ម្ខាង គេចខ្លួនចេញពីកន្លែងកើតហេតុបាត់ស្រមោល។

ក្រោយកើតហេតុ សមត្ថកិច្ចមូលដ្ឋាន បានសហការជាមួយជំនាញចរាចរណ៍ ចុះមកវាស់វែងយកម៉ូតូជនរងគ្រោះទៅរក្សាទុក។ ចំណែកសពជនរងគ្រោះ សមត្ថកិច្ចធ្វើកំណត់ហេតុប្រគល់ជូនទៅក្រុមគ្រួសារយកធ្វើបុណ្យតាមប្រពៃណី៕

អត្ថបទ ៖ ម៉េង