រដ្ឋបាលខេត្តកណ្ដាលណែនាំឲ្យម្ចាស់អាជីវកម្មផ្សព្វផ្សាយស្រាបៀរនៅបណ្ដោយផ្លូវជាតិលេខ១ត្រូវរុះរើចេញឲ្យអស់ត្រឹមថ្ងៃទី២៥​កក្កដា

រដ្ឋបាលខេត្តកណ្ដាលកាលពីថ្ងៃទី១៩ ខែកក្កដា ឆ្នាំ២០២៤ បានណែនាំដល់ម្ចាស់អាជីវកម្មផ្សព្វផ្សាយស្រាបៀរគ្រប់ប្រភេទនៅលើកំណាត់ផ្លូវជាតិលេខ១ ត្រូវរើរុះអាហ្វីស ប៉ាណូ និងផ្ទាំងផ្សព្វផ្សាយពាណិជ្ជកម្មស្រាបៀរគ្រប់ប្រភេទត្រឹមថ្ងៃទី២៥កក្កដា។ ជាមួយនឹងការជូនដំណឹងនេះ រដ្ឋបាលខេត្តក៏បានព្រមានដល់ម្ចាស់អាជីវកម្មណាដែលមានការយឺតយ៉ាវ ឬមិនបានអនុវត្តតាមការជូនណឹង រដ្ឋបាលខេត្តនឹងចាត់វិធានការច្បាប់។

តាមរយៈសេចក្ដីជូនដំណឹង ការដាក់តាំងផ្សាយពាណិជ្ជកម្មស្រាបៀរគ្រប់ប្រភេទពុំមានច្បាប់អនុញ្ញាត ពុំមានសណ្តាប់ធ្នាប់ និងរបៀបរៀបរយត្រឹមត្រូវ បានធ្វើឱ្យប៉ះពាល់យ៉ាងធ្ងន់ធ្ងរដល់សណ្តាប់ធ្នាប់ សោភ័ណភាពសាធារណៈ និងអាចបង្កឱ្យមានគ្រោះថ្នាក់ចរាចរណ៍តាមដងផ្លូវ។ ក្នុងន័យនេះ រដ្ឋបាលខេត្តស្នើដល់ម្ចាស់ក្រុមហ៊ុនស្រាបៀរ និងម្ចាស់អាជីវកម្ម សេវាកម្មផ្សព្វផ្សាយពាណិជ្ជកម្មទាំងអស់ដែលបានតំឡើងអាហ្វីស ប៉ាណូ និងផ្ទាំងផ្សាយពាណិជ្ជកម្ម ស្រាបៀរគ្រប់ប្រភេទដែលអត់ច្បាប់ ត្រូវធ្វើការរុះរើយកចេញឱ្យអស់ពីលើកំណាត់ផ្លូវជាតិលេខ១ ក្នុងភូមិសាស្ត្រខេត្តកណ្តាល ត្រង់ចំណុចចាប់ពីព្រំប្រទល់រាជធានីភ្នំពេញ-ខេត្តកណ្តាល រហូតដល់ព្រំប្រទល់ខេត្តកណ្តាល-ខេត្តព្រៃវែង យ៉ាងយូរបំផុតត្រឹមថ្ងៃទី២៥ ខែកក្កដា ឆ្នាំ២០២៤ ខាងមុខនេះ។

រដ្ឋបាលខេត្តក៏បានព្រមានដែរថា ក្នុងករណីយឺតយ៉ាវ ឬមិនបានអនុវត្តតាមការជូនដំណឹងនេះ ក្រុមការងារចម្រុះរដ្ឋបាលខេត្តនឹងធ្វើការចុះរុះរើអាហ្វីស ប៉ាណូ និងផ្ទាំងផ្សព្វផ្សាយពាណិជ្ជកម្មស្រាបៀរគ្រប់ប្រភេទក្នុងភូមិសាស្ត្រខាងលើ និងចាត់វិធានការច្បាប់។

គួររំឭកថា នាយករដ្ឋមន្រ្តី សម្តេចធិបតី ហ៊ុន ម៉ាណែត កាលពីខែកុម្ភៈ ឆ្នាំ២០២៤ បានបញ្ជាឱ្យអាជ្ញាធរ​ពាក់ព័ន្ធនានាពិនិត្យមើលឡើងវិញអំពីការផ្សព្វ​ផ្សាយ​ពាណិជ្ជកម្មគ្រឿងស្រវឹង ជាពិសេសការផ្សព្វផ្សាយនៅលើផ្ទាំងប៉ាណូតាមទី​សាធារណៈ ដោយត្រូវកម្រិតឱ្យបានសមរម្យ ដើម្បីរួមចំណែកក្នុងការកាត់បន្ថយគ្រោះថ្នាក់ចរាចរណ៍ដែលបង្កឡើងដោយ​សារ​ការបើកបរក្រោមឥទ្ធិពលគ្រឿងស្រវឹង៕

អត្ថបទ៖ សុខុម