អាជ្ញាធរ នឹងប្រើវិធានការក្ដៅលើអាជីវករលក់ដូររំលោភលើដងផ្លូវ ៣០ ម៉ែត្រ

បន្ទាប់ពីចេញសេចក្ដីជូនដំណឹងចំនួនពីរលើកពីការហាមដាក់របស់របរលក់ដូររំលោភលើចំណីផ្លូវសាធារណៈនៅលើផ្លូវ៣០ម៉ែត្រ ខាងមុខរោងចក្រមួយកន្លែង​ជាប់ហាង​ អតីត​ នីកាហ្វេ​ ភូមិត្រពាំងថ្លឹង៣​ សង្កាត់ចោមចៅទី១​ បច្ចុប្បន្នក្រុមអាជីវករនៅតែបន្តលក់ដូររំលោភលើចំណីផ្លូវដដែល ដែលធ្វើឲ្យមានការកកស្ទះចរាចរណ៍ និងបាត់បង់សណ្ដាប់ធ្នាប់សាធារណៈ។

រដ្ឋបាលសង្កាត់ចោមចៅទី១ នឹងចេញសេចក្ដីជូនដំណឹងបន្ថែមទៀត ហើយបើនៅតែបន្តសកម្មភាពដាក់របស់របរលក់ដូររំលោភចំណីផ្លូវទៀតនោះ អាជ្ញាធរនឹងប្រើវិធានការក្ដៅដោយចាប់យកសម្ភារយកមករក្សាទុក និងអនុវត្តតាមនីតិវិធី។ នេះបើតាមការឲ្យដឹងពីលោក​ កង​ វង​ ចៅសង្កាត់ចោមចៅទី១​ នៃរដ្ឋបាលខណ្ឌពោធិ៍សែនជ័យ ប្រាប់ កម្ពុជាថ្មី នៅព្រឹកថ្ងៃទី២៣កក្កដានេះ។

លោកចៅសង្កាត់បន្ថែមថា ទីតាំងខាងលេីលោកតែងចាត់កម្លាំងចុះរៀបចំសណ្តាប់ធ្នាប់ជាញឹកញាប់​ មិនត្រឹមតែប៉ុណ្ណោះលោកក៏បានចេញសេចក្តីជូនដំណឹងមិនឱ្យក្រុមអាជីវករទាំងនោះដាក់កញ្ជេី​ ល្អី​ រ៉ឺម៉ក​ លក់ដូរលេីចំណីផ្លូវទៀតដែរ​ ជាពិសេសម្ចាស់ផ្ទះដែលនៅទីតាំងនោះ មិនអនុញ្ញាតឱ្យជួលអោយក្រុមអាជីវករទាំងនោះទេ។ តែក្រុមអាជីវករនៅតែបន្តដាក់លក់ដដែល​។

លោកចៅសង្កាត់សង្កត់ធ្ងន់ថា លោកនឹងចេញសេចក្តីជូនដំណឹងម្ដងទៀត​ ហើយបេីនៅតែមិនស្តាប់ លោកនឹងចាត់កម្លាំងចុះទៅរៀបចំសណ្តាប់ធ្នាប់ និងចាប់យកសម្ភារៈមករក្សាទុកដើម្បីចាត់ការតាមនីតិវិធី។

សូមជម្រាបថា នៅលើចំណីផ្លូវ៣០ម៉ែត្រចំណុចខាងមុខរោងចក្រមួយកន្លែង​ជាប់ហាង​ អតីត​ នីកាហ្វេ​ ភូមិត្រពាំងថ្លឹង៣​ សង្កាត់ចោមចៅទី១​ ត្រូវបានក្រុមអាជីវករដាក់​ កញ្ជេី​ ល្អី​ និងរ៉ឺម៉ក​លក់ដូរលេីចំណែកផ្លូវស្ទេីរតែមួយចំហៀងផ្លូវទៅហេីយដោយមិនខ្លាចគ្រោះថ្នាក់​ ដែលធ្វើឲ្យកកស្ទះចរាចរណ៍ និងប៉ះពាល់សណ្តាប់ធ្នាប់សាធារណៈ៕

អត្ថបទ៖ សុខា