សន្តិសុខសង្គម

សមត្ថកិច្ចឃាត់ខ្លួនក្រុមអ្នកលេងល្បែងជល់មាន់តាមអនឡាញ ០៤ នាក់ នៅខណ្ឌឫស្សីកែវ

បានផុស

៧ ខែ មុន

នៅ

ថ្ងៃពុធ ២៤ កក្កដា ២០២៤

ដោយ

កម្លាំងសមត្ថកិច្ចនគរបាលខណ្ឌឫស្សីកែវ ចុះបង្ក្រាបទីតាំងបើកល្បែងស៊ីសងខុសច្បាប់(ភ្នាល់មាន់តាមអនឡាញ) និងឃាត់ខ្លួនជនសង្ស័យចំនួន ៤ នាក់ ក្នុងនោះមានជនជាតិវៀតណាមម្នាក់ កាលពីរសៀល ថ្ងៃទី ២៣ ខែកក្កដា ឆ្នាំ ២០២៤ នៅចំណុចផ្លូវលំ ក្រុម ៦ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក ហ៊ាង ថារ៉េត អធិការខណ្ឌឫស្សីកែវ បានឲ្យដឹងថា ជនសង្ស័យ ០៤ នាក់ រួមមាន ១.ឈ្មោះ ឌឹក តង អាយុ ៥០ ឆ្នាំ ជនជាតិវៀតណាម មុខរបរកម្មករសំណង់ ស្នាក់នៅបន្ទប់ជួល ផ្លូវបេតុង ភូមិបឹងឈូក សង្កាត់គីឡូម៉ែត្រលេខ ៦ ខណ្ឌឫស្សីកែវ។ ទី២.ឈ្មោះ ញឹម ឡាង អាយុ ៣៦ ឆ្នាំ មុខរបរនៅផ្ទះ ស្នាក់នៅបន្ទប់ជួល ផ្លូវបេតុង ភូមិទួលសង្កែ សង្កាត់ទួលសង្កែទី ១ ខណ្ឌឫស្សីកែវ។ ទី៣.ឈ្មោះ ប្រាក់ មុន្នី អាយុ ៥៤ ឆ្នាំ មុខរបរនៅផ្ទះ ស្នាក់នៅបន្ទប់ជួល ផ្លូវបេតុង ភូមិទួលសង្កែ សង្កាត់ទួលសង្កែទី ១ ខណ្ឌឫស្សីកែវ និង ទី៤.ឈ្មោះ ឈិត កុម្ភៈ អាយុ ៣០ ឆ្នាំ មុខរបរនៅផ្ទះ មានទីលំនៅផ្ទះលេខ ៤៨៧ ផ្លូវ ៣០០ ភូមិ ៥ សង្កាត់បឹងកេងកង ២ ខណ្ឌបឹងកេងកង។ ចំណែកសម្ភារៈដកហូតបានរួមមាន ៖ IPAD០១ គ្រឿង (ឧបករណ៍សម្រាប់ភ្នាល់មាន់ជល់អនឡាញ)។

បច្ចុប្បន្ន ជនសង្ស័យ រួមទាំងវត្ថុតាងខាងលើ ត្រូវបានឃាត់ខ្លួនបណ្ដោះអាសន្ននៅអធិការដ្ឋានខណ្ឌឫស្សីកែវ ដើម្បីធ្វើការសាកសួរ និងកសាងសំណុំរឿងចាត់ការតាមនីតិវិធី៕

អត្ថបទ ៖ សុខា