សាលាដំបូង សម្រេចបញ្ជូនប៉ូលិសគ្រឿងញៀន ៣ នាក់ ឃុំខ្លួននៅពន្ធនាគារខេត្តស្ទឹងត្រែង

អយ្យការអមសាលាដំបូងខេត្តស្ទឹងត្រែង បានសម្រេចឃុំខ្លួនប៉ូលិសគ្រឿងញៀនចំនួន ៣ នាក់ នៅរសៀលថ្ងៃទី២៤ ខែកក្កដា ឆ្នាំ២០២៤ នេះ។ ប៉ូលិស ៣ នាក់ មាននាយការិយាល័យគ្រឿងញៀនខេត្តស្ទឹងត្រែង និងរងការិយាល័យគ្រឿងញៀន ២ នាក់ ត្រូវបានកម្លាំងអាវុធហត្ថធ្វើការឡោមព័ទ្ធផ្ទះ កាលពីថ្ងៃទី២១ ខែកក្កដា ឆ្នាំ២០២៤ កន្លងទៅ តែត្រូវបានអាវុធហត្ថមិនផ្ដល់ព័ត៌មាន រង់ចាំការស្រាវជ្រាវ និងស៊ើបរហូតមកដល់ ថ្ងៃទី២៤ កក្កដា នេះត្រូវបានឃុំខ្លួន។

តាមប្រភពព័ត៌មានពីសមត្ថកិច្ចបានឱ្យដឹងថា ការឡោមព័ទ្ធផ្ទះនាយការិយាល័យប្រឆាំងគ្រឿងញៀនខេត្តខាងលើ ក្រោយពី កម្លាំងអាវុធហត្ថ បានធ្វើការបង្ក្រាបករណីចោរលួចកាត់ខ្សែភ្លើង ឃាត់ខ្លួនជនសង្ស័យប្រើប្រាស់គ្រឿងញៀន ហើយបានឆ្លើយសារភាពថាជាប់ពាក់ព័ន្ធ និងអាវុធហត្ថបានចុះឃាត់ខ្លួន អនុប្រធានការិយាល័យប្រឆាំងគ្រឿងញៀន ២ នាក់បន្ថែមទៀត។

ប្រភពពីសមត្ថកិច្ចអាវុធហត្ថ បានបន្តឱ្យដឹងទៀតថា ក្រោយពីកម្លាំងអាវុធហត្ថធ្វើការស្រាវជ្រាវ និងស៊ើបអង្កេតយ៉ាងយកចិត្តទុកដាក់ សមត្ថកិច្ចបានកសាងសំណុំរឿងបញ្ជូនប៉ូលិសមាន ប្រធាន និងអនុប្រធានទៅកាន់អយ្យការអមសាលាដំបូងខេត្តស្ទឹងត្រែង ដោយចោទប្រកាន់ និងបានបញ្ជូនបន្តទៅចៅក្រមស៊ើបសួរ ហើយសម្រេចឃុំខ្លួននៅព័ន្ធនាគារខេត្តស្ទឹងត្រែងបណ្ដោះអាសន្ន រង់ចាំធ្វើការស៊ើបអង្កេតបន្ត។

ឧត្តមសេនីយ៍ទោ អូត ស៊ីវត្ថា ស្នងនគរបាលខេត្តស្ទឹងត្រែង បានប្រាប់តាមប្រព័ន្ធតេឡេក្រាមមកអ្នកយកព័ត៌មាន នៅថ្ងៃទី២៤ កក្តដា ២០២៤ នេះថា រឿងនេះគ្រាន់តែជាចម្លើយសារភាពរបស់ចោរលួចខ្សែភ្លើង ដែលប្រើប្រាស់គ្រឿងញៀន ដោយភស្តុតាងពិត ឬមិនពិត គឺអត់ទាន់មានទេ។ បើមានភស្តុតាងពិត នឹងអនុវត្តធ្វើតាមផ្លូវច្បាប់។ លោកបញ្ជាក់បន្ថែមថា ច្បាប់គឺច្បាប់ ខុសត្រូវគឺនៅរង់ចាំស៊ើបអង្កេតបន្ត។

លោក ឈុំ ស៊ាងហាក់ អ្នកនាំពាក្យសាលាដំបូងខេត្តស្ទឹងត្រែង បានឱ្យដឹងនៅថ្ងៃទី២៤ កក្តដា ២០២៤ នេះថា ក្នុងសំណុំរឿងខាងលើនេះ ព្រះរាជអាជ្ញា និងចៅក្រម បានចោទប្រកាន់រួចរាល់ និងចេញដីកាឃុំខ្លួនរួចហើយ។ ចំណែកវត្ថុតាងរឹបអូសរួមមាន ប្រាក់ដុល្លារសុទ្ធចំនួន ៤ ម៉ឺនដុល្លារ (បួនម៉ឺនដុល្លារ) ប្រាក់ដុល្លារក្លែងក្លាយ (លុយសែន) ចំនួន ១៧៨ ១០០ ដុល្លារ (ដប់ប្រាំពីម៉ឺនប្រាំបីពាន់មួយរយដុល្លា) គ្រឿងញៀនចំនួន ៣,១៧ ក្រាម ទូរស័ព្ទដៃ ៥ គ្រឿង រថយន្តម៉ាកហាយឡិនឌ័រ ១ គ្រឿង និងអាវុធខ្លី ១ ដើម គ្រាប់ ៣៤ គ្រាប់៕

អត្ថបទ៖ ងិនលីម