Update៖ ករណីអគ្គិភ័យនៅក្រុងដូនកែវ ឆេះផ្ទះអស់៥ល្វែង និងផ្ទះវីឡាមួយខ្នង

តាមការបញ្ជាក់ពីលោកឧត្តមសេនីយ៍ត្រី សៅ សារុន ស្នងការរង និងជាអ្នកនាំពាក្យស្នងការដ្ឋាននគរបាលខេត្តតាកែវ បានឱ្យដឹងថា ករណីអគ្គិភ័យឆេះផ្ទះនៅក្រុងដូនកែវ បានបណ្ដាលឲ្យឆេះផ្ទះចំនួន៥ល្វែង និងផ្ទះវិឡាកម្ពស់២ជាន់មួយខ្នង រួមទាំងសម្ភារមួយចំនួនធំ។

លោកស្នងការរងបញ្ជាក់ថា កម្លាំងស្នងការដ្ឋាននគរខេត្តបាលប្រើប្រាស់ឡានទឹកសរុប១៤រថយន្ត គឺស្នងការដ្ឋានខេត្តតាកែវ១១រថយន្ត ស្នងការនគរបាលរាជធានីភ្នំពេញ ៣រថយន្តបានចុះជួយអន្តរាគមន៍បាញ់ទឹកពន្លត់ ដោយបានប្រើប្រាស់ទឹកសរុបអស់ចំនួន៧១រថយន្ត ទើបអាចគ្រប់គ្រងស្ថានការគ្រោះអគ្គិភ័យនេះបានទាំងស្រុង។

សូមបញ្ជាក់ថា កាលពីវេលាម៉ោង៧យប់ ថ្ងៃទី២៥ ខែកក្កដា ឆ្នាំ២០២៤ មានករណីអគ្គិភ័យមួយបានឆាបឆេះផ្ទះលក់ដូរសម្ភារៈគ្រឿងបន្លាស់រថយន្ដ និងម៉ូតូយ៉ាងសន្ធោសន្ធៅ នៅភូមិឡូរី សង្កាត់រកាក្នុង ក្រុងដូនកែវ ខេត្តតាកែវ។

ករណីនេះ បើតាមការបញ្ជាក់ពីសមត្ថកិច្ចបានឲ្យដឹងថា គឺបណ្តាលមកពីឆ្លងចរន្តអគ្គិសនី៕

អត្ថបទ៖ វីរៈ