សន្តិសុខសង្គម

សិស្សសាលាម្នាក់ ចេញពីទាត់បាល់ ជិះម៉ូតូទៅបុកពីក្រោយកុងតឺន័រចតស្ងៀមលើចិញ្ចើមផ្លូវ បោកក្បាលស្លាប់

បានផុស

៦ ខែ មុន

នៅ

ថ្ងៃចន្ទ ២៩ កក្កដា ២០២៤

ដោយ

យុវជនជាសិស្សសាលាថ្នាក់ទី ១០ ម្នាក់ ជិះម៉ូតូចេញពីលេងទាត់បាល់ត្រឡប់ទៅផ្ទះវិញ ក៏ជួបគ្រោះថ្នាក់ចរាចរណ៍ បុកពីក្រោយកុងតឺន័រដែលចតចោលនៅលើចិញ្ចើមផ្លូវបណ្ដាលឲ្យបោកផ្ទប់បាក់ ក ស្លាប់ភ្លាមៗ ហើយរថយន្តក៏បានបើកគេចពីកន្លែងកើតហេតុបាត់ស្រមោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍គ្រោះថ្នាក់ចរាចរណ៍ខាងលើនេះដែរបង្កការភ្ញាក់ផ្អើលកាលពីវេលាម៉ោង ៧ និង ៣០ នាទីយប់ ថ្ងៃទី ២៨ ខែកក្កដា ឆ្នាំ ២០២៤ ចំណុចមុខខ្លោងទ្វារវត្តជើងឯក ស្ថិតលើផ្លូវ ២១៧ សង្កាត់ជើងឯក ខណ្ឌដង្កោ រាជធានីភ្នំពេញ។

ជនរងគ្រោះ(សព)មានឈ្មោះ យូ គីមហាក់ អាយុ ១៦ ឆ្នាំ ជាសិស្សថ្នាក់ទី ១០ រស់នៅម្ដុំកួរស្រូវ ៣ ក្នុងមូលដ្ឋានខណ្ឌដង្កោ។

បើតាមការបញ្ជាក់ពីបុរសម្នាក់ សុំមិនបញ្ចេញឈ្មោះ បានឃើញហេតុការណ៍ខាងលើ ប្រាប់ឲ្យដឹងថា មុនកើតហេតុគេឃើញយុវជនរងគ្រោះជិះម៉ូតូមួយគ្រឿង ម៉ាកហុងដា Scoopy ពណ៌ខ្មៅ ពាក់ស្លាកលេខ ភ្នំពេញ 1HY-1697 ជិះតាមបណ្ដោយផ្លូវ ២១៧ ទិសដៅពីកើតមកលិច ក្នុងល្បឿនលឿន ខណៈមកដល់ចំណុចកើតហេតុ ពុំដឹងថាជនរងគ្រោះមានបញ្ហាអ្វីនោះទេ ស្រាប់ជ្រុលចង្កូតបុកពីក្រោយរថយន្តកុងតឺន័រមួយគ្រឿង មិនចាំស្លាកលេខ ដែលបើកយកមកចតនៅលើដងផ្លូវ យ៉ាងពេញទំហឹង បណ្ដាលឲ្យបោកផ្ទប់ពីក្រោយបាក់ ក ស្លាប់យ៉ាងរន្ធត់ក្នុងថ្លុកឈាម ក្រោយពីបុករួច ក៏មានតៃកុងឡើងមកបើករថយន្តខាងលើគេចខ្លួនពីកន្លែងកើតហេតុបាត់ស្រមោល។

បន្ទាប់ពីកើតហេតុសមត្ថកិច្ចមូលដ្ឋានសហការជាមួយនឹងជំនាញចរាចរណ៍ នៃអធិការដ្ឋាននគរបាលខណ្ឌដង្កោចុះមកដល់វាស់វែងយកម៉ូតូជនរងគ្រោះទៅរក្សាទុកជាបណ្ដោះអាសន្ន រួចទាក់ទងហៅក្រុមគ្រួសារឲ្យមកទទួលសពយកទៅធ្វើបុណ្យតាមប្រពៃណី។ ចំណែកឯរថយន្ត សមត្ថកិច្ចនឹងធ្វើការស្រាវជ្រាវនៅពេលក្រោយ៕

អត្ថបទ ៖ សំណាង