សន្តិសុខសង្គម

សមត្ថកិច្ចផាកពិន័យអ្នកបើកបរម៉ូតូចំនួន ៣២ គ្រឿង ជិះបញ្ច្រាសផ្លូវ

បានផុស

៥ ខែ មុន

នៅ

ថ្ងៃពុធ ៣១ កក្កដា ២០២៤

ដោយ

កម្លាំងសមត្ថកិច្ចចរាចរណ៍ខណ្ឌចំការមន បានផាកពិន័យ និងអប់រំម្ចាស់ម៉ូតូ ចំនួន ៣២ គ្រឿង ដែលបើកបរបញ្ច្រាសផ្លូវនៅលើបណ្ដោយផ្លូវព្រះនរោត្តម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះផាកពិន័យនេះធ្វើឡើងកាលពីវេលាម៉ោង ០៧ ព្រឹក ថ្ងៃទី ៣១ ខែកក្កដា ឆ្នាំ ២០២៤ នៅត្រង់ចំណុចខាងមុខសណ្ឋាគារតាយម៉េងចាស់ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

បើតាមការបញ្ជាក់ពីសមត្ថកិច្ចបានឲ្យដឹងថា កម្លាំងសមត្ថកិច្ចបានឃាត់ និងផាកពិន័យទៅកាន់អ្នកបើកម៉ូតូបញ្ច្រាសផ្លូវចំនួន ៣២ គ្រឿង ដែលល្មើសច្បាប់ចរាចរណ៍ផ្លូវគោក។ ក្នុងនោះ កម្លាំងជំនាញធ្វើការផាកពិន័យក្នុងមួយគ្រឿងចំនួន ១០ ម៉ឺនរៀល ចំពោះមធ្យោបាយដែលបើកបរល្មើសចរាចរណ៍(បញ្ច្រាសផ្លូវ)។

សមត្ថកិច្ចបន្តទៀតថា មុននឹងឈានដល់ការផាកពិន័យនេះដែរ កន្លងមកធ្លាប់ធ្វើការអប់រំចំនួន ២ សប្តាហ៍មកហើយ ប៉ុន្តែនៅតែមានប្រជាពលរដ្ឋមួយចំនួនបើកបញ្ច្រាសផ្លូវដែលបង្កឲ្យប៉ះពាល់ដល់សណ្ដាប់ធ្នាប់សុវត្ថិភាពចរាចរណ៍។

ជាចុងក្រោយ សមត្ថកិច្ចជំនាញ នៃអធិការដ្ឋាននគរបាលខណ្ឌចំការមន ក៏បានប្រកាសជូនដំណឹងអំពីការផាកពិន័យ ចាប់ពីថ្ងៃទី ៣១ ខែកក្កដា ឆ្នាំ ២០២៤ តទៅ ក្នុងករណីប្រជាពលរដ្ឋនៅតែមិនរាងចាលបន្តបើកបរម៉ូតូ(បញ្ច្រាសផ្លូវ)ល្មើសច្បាប់ចរាចរណ៍ផ្លូវគោកនោះ៕

អត្ថបទ ៖ ម៉េង