នគរបាលប៉ុស្ដិ៍រដ្ឋបាលឪឡោក នាំខ្លួនយុវសិស្ស២​នាក់​មកអប់រំ ករណីបំពាក់ស៊ីម៉ាំងកែច្នៃឮខ្លាំង

យុវសិស្សចំនួនពីរនាក់​កំពុងជិះម៉ូតូធ្វើដំណើរតាមផ្លូវដោយមានបំពាក់ស៊ីម៉ាំងកែច្នៃសម្លេងឮខ្លាំងៗត្រូវបានកម្លាំង​សមត្ថកិច្ចឃាត់នាំមកប៉ុស្តិ៍នគរបាលរដ្ឋបាលឪឡោក នៃអធិការដ្ឋាននគរបាលខណ្ឌកំបូល​ ដេីម្បីណែនាំអប់រំ​ នៅថ្ងៃទី០៦ ខែសីហា ឆ្នាំ២០២៤។

ការនាំខ្លួនយុវសិស្សទាំងពីរនាក់មកអប់រំនៃនាំនេះ បានធ្វើឡើងនៅពេលដែលកម្លាំងសមត្ថកិច្ចជិះល្បាតក្នុងមូលដ្ឋាន​ នៅចំណុចផ្លូវបេតុង៤២ស្ថិតនៅ ភូមិត្រពាំងពោធិ៍​ សង្កាត់ឪឡោក បានឃើញម៉ូតូចំនួន០១គ្រឿង បេីកបរដោយយុវសិស្សចំនួនពីរនាក់​ កំពុងធ្វើដំណើរតាមផ្លូវដោយមានបំពាក់ស៊ីម៉ាំងកែច្នៃសម្លេងឮខ្លាំង ភ្លាមៗនោះ សមត្ថកិច្ចបានធ្វើការឃាត់អ្នកបើកបរ និងអ្នករួមដំណើរ រួមទាំងម៉ូតូខាងលើ យកមកប៉ុស្តិ៍នគរបាលរដ្ឋបាលឪឡោកតែម្ដង។

ក្រោយពីអប់រំណែនាំ និងធ្វើកិច្ចសន្យាបញ្ឈប់បំពាក់បំពង់សុីម៉ាំងកែច្នៃ សមត្ថកិច្ចបានឱ្យដោះស៊ីម៉ាំងកែច្នៃចេញ និងយកបំពង់សុីម៉ាំងដើមមកបំពាក់វិញ។

គួរបញ្ជាក់ថា​ ក្រោយសមត្ថកិច្ចធ្វើការអប់រំណែនាំ និងធ្វើកិច្ចសន្យារួច​ សមត្ថកិច្ចបានហៅអាណាព្យាបាលមកធានា ដើម្បីត្រឡប់ទៅលំនៅដ្ឋានវិញផងដែរ។ ជាមួយគ្នានេះ​ សមត្ថកិច្ចក៏បានអំពាវនាវដល់ឪពុកម្តាយ ព្រមទាំងអាណាព្យាបាលទាំងអស់ ត្រូវខិតខំតាមដាន អប់រំ និងទូន្មានប្រៀនប្រដៅដល់កូនៗ ឱ្យដើរតាមគន្លងត្រឹមត្រូវចាកនូវអំពើអបាយមុខ ដើម្បីក្លាយជាពលរដ្ឋល្អសម្រាប់សង្គមជាតិ ព្រោះយុវជនទាំងអស់ គឺជាទំពាំងស្នងឫស្សីរបស់ប្រទេសជាតិ៕ឮ

​អត្ថបទ៖ សុខា