នគរបាលប៉ុស្តិ៍ស្ទឹងមានជ័យទី១ ឃាត់អ្នកបើកបរបញ្រ្ចាសផ្លូវព្រះមុន្នីរ៉េតអប់រំណែនាំ

កម្លាំងនគរបាលប៉ុស្តិ៍ស្ទឹងមានជ័យទី១ សហការគ្នាជាមួយអាជ្ញាធរសង្កាត់ បានចុះអនុវត្តចាប់ឃាត់មធ្យោបាយទាំង ឡាយដែលបើកបរបញ្ច្រាសផ្លូវ នៅតាមបណ្តោយមហាវិថីព្រះមុន្នីរ៉េត អប់រំណែនាំឱ្យបញ្ឈប់ការជិះបញ្ច្រាសបន្តទៅថ្ងៃមុខទៀត ដើម្បីកាត់បន្ថយការកកស្ទះចរាចរណ៍ និងសណ្ដាប់ធ្នាប់សាធារណៈ ជាពិសេសបញ្ជៀសគ្រោះថ្នាក់ចរាចរណ៍។

លោកអនុសេនីយ៍ទោ វ៉ា ផានិត មន្ត្រីនគរបាលចរាចរណ៍ប៉ុស្តិ៍ស្ទឹងមានជ័យទី១ បានប្រាប់ឱ្យដឹងថា ការអនុវត្តនៅពេលនេះ មិនមែនជាការអនុវត្តច្បាប់ដោយការផាកពិន័យនោះឡើយ គឺជាការអនុវត្តដោយផ្សារភ្ជាប់ជាមួយនឹងការអប់រំលើពលរដ្ឋដែលបើកបរល្មើស ឱ្យពួកគាត់បានយល់ដឹងកាន់តែទូលំទូលាយពីច្បាប់ចរាចរណ៍ និងបញ្ចៀសបានពីគ្រោះថ្នាក់ជាយថាហេតុណាមួយ ដែលនាំឱ្យរងគ្រោះដល់ពួកគាត់ និងអ្នកដំណើរដទៃទៀត។

ពលរដ្ឋដែលជាអ្នកបើកបរបញ្ច្រាសផ្លូវ ក្រោយទទួលបានការអប់រំរបស់នគរបាល បានទទួលស្គាល់កំហុសចំពោះការបើកបរខុស ហើយក៏អរគុណសមត្ថកិច្ច ដែលបានអប់រំណែនាំពួកគាត់ ដោយពួកគាត់ប្តេជ្ញានឹងចូលរួមគោរពច្បាប់ឱ្យបានខ្ជាប់ខ្ជួនមិនបន្តបំពានទៀតនោះឡើយ។

ចំពោះសកម្មភាពបើកបរល្មើសដោយការជិះបញ្ច្រាសផ្លូវនេះ គឺតែងតែងឧស្សាហ៍កើតមានឡើងជាប្រចាំនៅលើដងផ្លូវនេះ ដោយសារពលរដ្ឋអ្នកដំណើរមួយចំនួន មិនអាចធ្វើដំណើរឱ្យបានត្រឹមត្រូវលើគន្លងផ្លូវកកស្ទះរបស់ខ្លួន បែរជានាំគ្នាទៅលើគន្លងផ្លូវអាទិភាពរបស់អ្នកដទៃ ព្រោះតែការមើលឃើញថា ផ្លូវស្រលះល្អ ប៉ុន្តែមិនបានគិតគូរពីរបៀបរៀបរយក្នុងការបើកបរ ពិសេសការកើតមានគ្រោះថ្នាក់ចរាចរណ៍ជាយថាហេតុបាន៕

អត្ថបទ៖ សុភា