ផាកពិន័យបុរសម្នាក់៤០​ម៉ឺន​រៀល បន្ទាប់ពីចាក់សំរាមបណ្ដែតតាមទឹកពេលមេឃកំពុងភ្លៀងកាលពីយប់មិញ

ក្រោយពីទទួលបានព័ត៌មានចែកចាយនៅលើបណ្តាញសង្គមពីសកម្មភាពបុរសម្នាក់ចាក់សំរាមបណ្ដែតតាមទឹកហូរពេលភ្លៀងធ្លាក់កាលពីល្ងាចម្សិលម្សិញរួចមក នៅព្រឹកថ្ងៃសុក្រ ទី៩ ខែសីហា ឆ្នាំ២០២៤នេះ រដ្ឋបាលខណ្ឌដូនពេញ បានអញ្ជើញបុរសរូបនោះមកសួរនាំ និងពិន័យជាប្រាក់ចំនួន៤០ម៉ឺនរៀល។ ការពិន័យនេះដោយយោងតាមមាត្រា ៤២ ជំពូកទី៧ នៃអនុក្រឹត្យលេខ ១១៣ អនក្រ.បក របស់ក្រសួងបរិស្ថាន។

ជាមួយនឹងការផាកពិន័យនេះ រដ្ឋបាលខណ្ឌក៏បានណែនាំ និងហាមមិនឱ្យមានការចាក់សំរាមពាសវាលពាសកាលបន្តទៀត និងត្រូវរៀបចំទុកដាក់សំរាមឱ្យមានរបៀបរៀបរយ។ បុរសរូបនោះក៏បានទទួលស្គាល់កំហុកពិតជាបានចាក់សំរាមចូលតាមទឹកហូរពេលភ្លៀងធ្លាក់ពិតប្រាកដមែន៕

អត្ថបទ៖ សុភា