អភិបាលខណ្ឌសែនសុខ ដឹកនាំកម្លាំងបាញ់ទឹកសម្អាតផ្លូវក្រោយជំនន់ទឹកភ្លៀងស្រកអស់ទៅវិញ

ដេីម្បី​សម្រួលដល់ការប្រកបអាជីវកម្មរបស់អាជីវករ​ដែលប្រកបរបរផ្សេងៗតាមបណ្តោយផ្លូវ​ និងសម្រួលដល់ការធ្វេីដំណេីររបស់ប្រជាពលរដ្ឋមិនអោយរអិល​ និងហុយដី​ បន្ទាប់ពីជំនន់ទឹកភ្លៀងបានស្រកអស់ពីផ្លូវ​ នៅព្រឹកថ្ងៃទី១១​ ខែសីហា​ ឆ្នាំ២០២៤​នេះ​ ក្រុមការងាររដ្ឋបាលរាជធានីភ្នំពេញ​ សហការជាមួយរដ្ឋបាលខណ្ឌសែនសុខ​ ដាក់រថយន្តចំនួន៦គ្រឿង​ បាញ់លាងសម្អាតផ្លូវ១៩៨៦​ ចាប់ពីផ្លូវលេខ៥៩៨​ ដល់ផ្លូវ១០១៩​ បាញ់លាងសម្អាតផ្លូវលេខ​ ១៩៨០​ និងផ្លូវ​លេខ​ ១០០៣​ ​ក្នុងសង្កាត់ភ្នំពេញថ្នី​ ខណ្ឌសែនសុខ​ រាជធានីភ្នំពេញ​។

លោក ម៉ូវ ម៉ានិត អភិបាលខណ្ឌសែនសុខ បានឲដឹងថា ក្រោយពីជំនន់ទឹកភ្លៀងបានស្រកចុះអស់ លោកបានដឹកនាំមន្តី្រសាលាខណ្ឌ សហការជាមួយសាលារាជធានីភ្នំពេញបានដាក់រថយន្តបាញ់លាងសម្អាតផ្លូវ ចំនួន២ទីតាំងផ្សេងគ្នា ទី១ផ្លូវ ចូលវត្តសុវណ្ណមុនីសាគរ​( ហៅសំរោងអណ្តែត​ )​ ចាប់ក្លោងទ្វារផ្លូវលេខ១០១៩​ ទៅកាន់វត្ត​ ក្នុងភូមិរោងចក្រ១​ ភូមិ​ក្រុងថ្មី​ សង្កាត់គោកឃ្លាង​ ខណ្ឌសែនសុខ ទីតាំងទី២បាញ់ លាងសម្អាតផ្លូវ១៩៨៦​ ចាប់ពីផ្លូវលេខ៥៩៨​ ដល់ផ្លូវ១០១៩​ និងផ្លូវលេខ​ ១៩៨០​ ផ្លូវ​លេខ​ ១០០៣​ ​ក្នុងសង្កាត់ភ្នំពេញថ្នី​ ខណ្ឌសែនសុខ។

ជាមួយគ្នានឹងការចុះលាងសម្អាតនេះ លោកអភិបាលខណ្ឌក៏បានសំណូម អំពាវនាវដល់ប្រជាពលរដ្ឋ សូមចូលរួមរក្សាសណ្តាប់ធ្នាប់ អនាម័យ ក្នុងការវេចខ្ចប់ ទុកដាក់សំរាមអោយបានត្រឹមត្រូវដើម្បីរង់ចាំរថយន្តមកប្រមូល ជៀសវាងនារដូវភ្លៀង អាចហូរចូលមាត់លូបង្កជាការកកស្ទះប្រព័ន្ធបង្ហូរ៕

អត្ថបទ៖ សំណាង