សន្តិសុខសង្គម

នគរបាលខេត្តកណ្ដាល ស្រាវជ្រាវឃាត់ខ្លួនក្រុមក្មេងទំនើងបានម្នាក់ ក្រោយមានការផ្សព្វផ្សាយតាមបណ្ដាញសង្គម

បានផុស

៨ ខែ មុន

នៅ

ថ្ងៃអង្គារ ១៣ សីហា ២០២៤

ដោយ

ក្មេងទំនើងចំនួន ២ ក្រុម បានបើកឆាកប្រយុទ្ធគ្នា ត្រូវប្រជាពលរដ្ឋថតជាវីដេអូបង្ហោះលើបណ្ដាញសង្គម ផ្អើលដល់ស្នងការនគរបាលខេត្តកណ្ដាល បញ្ជាឲ្យចុះស្រាវជ្រាវឃាត់ខ្លួនបានម្នាក់ កាលពីរសៀលថ្ងៃទី ១២ ខែសីហា ឆ្នាំ ២០២៤ ស្ថិតក្នុងភូមិថ្មី ឃុំពោធិបាន ស្រុកកោះធំ ខេត្តកណ្ដាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃទី ១៣ ខែសីហា ឆ្នាំ ២០២៤ នេះ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្ដាល បានឆ្លើយតបបំភ្លឺជូនសាធារណជនទៅនឹងគណនីហ្វេសប៊ុកឈ្មោះ ឡេង ចំណាប់ បោះពុម្ព និង លក់គ្រឿងសង្ហារិម ដែលបានបង្ហោះវីដេអូសកម្មភាពក្មេងទំនើងវាយគ្នា អមដោយខ្លឹមសារថា «ហេតុការណ៍ក្មេងទំនើងវាយគ្នានៅមុននេះបន្តិច»។

ជាក់ស្ដែងក្រោយពីទទួលបានព័ត៌មានខាងលើរួច សមត្ថកិច្ច ក៏បានចុះទៅដល់កន្លែងកើតហេតុ និងធ្វើការស្រាវជ្រាវកំណត់អត្តសញ្ញាណជនសង្ស័យមានគ្នាចំនួន ០៣ នាក់។

ក្នុងចំណោមបក្ខពួកជនសង្ស័យចំនួន ៣ នាក់ សមត្ថកិច្ច បានធ្វើការឃាត់ខ្លួនជនសង្ស័យជាជនដៃដល់បាន ១ នាក់ ឈ្មោះ ម៉ោង ភារៈ ភេទប្រុស អាយុ ២០ ឆ្នាំ ជនជាតិខ្មែរ មានទីលំនៅភូមិថ្មី ឃុំពោធិបាន ស្រុកកោះធំ ខេត្តកណ្ដាល។

ចំពោះជនសង្ស័យចំនួន ០២ នាក់ទៀត ដែលមានឈ្មោះ ផល្លី វ៉ាន់ឌី និងឈ្មោះ ពៅ ប្រិមប្រិយ បានរត់គេចខ្លួនបាត់ តែសមត្ថកិច្ចកំពុងធ្វើការស្រាវជ្រាវតាមចាប់ខ្លួនបន្តទៀត។

បច្ចុប្បន្ន សមត្ថកិច្ចជំនាញស្រុកកោះធំ បាននិងកំពុងរៀបចំឯកសារកសាងសំណុំរឿងចាត់ការតាមនីតិវិធី នៃច្បាប់។

សូមបញ្ជាក់ថា កិច្ចប្រតិបត្តិការនេះ ក្រោមការចង្អុលបង្ហាញពី លោកឧត្ដមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល និងដាក់បទបញ្ជាឲ្យ លោកអធិការ នៃអធិការដ្ឋាននគរបាលស្រុកកកោះធំ ដឹកនាំកម្លាំងជំនាញ និងប៉ុស្តិ៍នគរបាលរដ្ឋបាលពោធិ បានចុះធ្វើការស្រាវជ្រាវបង្ក្រាបករណីខាងលើ៕

អត្ថបទ ៖ សំណាង