បុរសម្នាក់អះអាងថាត្រូវជនសង្ស័យវាយប្លន់យកម៉ូតូនៅម្ដុំលូប្រាំ

បុរសម្នាក់អះអាងថាត្រូវបានជនសង្ស័យវាយក្បាលរួចប្លន់យកម៉ូតូមួយគ្រឿងបានសម្រេចពេលជិះមកលេងផ្ទះបងនៅម្ដុំលូ៥ ក្នុងសង្កាត់ស្ទឹងមានជ័យទី៣។

ហេតុការណ៍ភ្ញាក់ផ្អើលខាងលើនេះដែរបង្កការភ្ញាក់ផ្អើលកាលពីវេលាម៉ោង១ជាងរំលងអធ្រាតឈានចូលថ្ងៃទី១៤ខែសីហា ឆ្នាំ២០២៤ ស្ថិតនៅជិតស្តុបលូ៥ ក្នុងមូលដ្ឋានសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

បើតាមសម្ដីបុរសជាជនរងគ្រោះបានឲ្យដឹងថា មុនពេលកើតហេតុខ្លួនបានជិះម៉ូតូម៉ាកហុងដា scoopy មួយគ្រឿងមិនចាំស្លាកលេខ ចេញពីផ្ទះមកហូបអីមួយភ្លែត ក្រោយពីហូបរួចក៏ឆ្លៀតមកលេងផ្ទះបងនៅម្តុំលូ៥ ខណះជិះមកដល់ចំណុចកើតហេតុស្រាប់តែលេចមុខជនសង្ស័យមានគ្នា២នាក់មកធ្វើសកម្មភាពស្ទាក់រួចវាយត្រង់ក្បាលបណ្តាលឲ្យរងរបួសស្នាម ហើយជនសង្ស័យក៏បានយកម៉ូតូជនរងគ្រោះជិះគេចខ្លួនបាត់ស្រមោល។

ក្រោយកើតហេតុ ជនរងគ្រោះ និងក្រុមគ្រួសារក៏បានមកប៉ុស្តិ៍នគរបាលរដ្ឋបាលសង្កាត់ស្ទឹងមានជ័យទី៣ ដើម្បីដាក់ពាក្យបណ្តឹងសុំឲ្យសមត្ថកិច្ចជួយស្រាវជ្រាវឃាត់ខ្លួនក្រុមសង្ស័យទាំងនោះយកមកចាត់ការទៅតាមច្បាប់។

លោកវរសេនីយ៍ត្រី ឯម ភារី នាយប៉ុស្ដិ៍នគរបាលរដ្ឋបាលស្ទឹងមានជ័យទី៣ បាននឲ្យដឹងនៅព្រឹកថ្ងៃទី១៤សីហានេះថា ករណីនេះមិនទាន់ច្បាស់ថា ជាករណីប្លន់ឬយ៉ាងណានោះទេ ដោយសារជនរងគ្រោះ និងជនសង្ស័យជាអ្នកធ្លាប់ស្គាល់គ្នា ហើយលោកក៏កំពុងសិក្សាស្រាវជ្រាវបន្ថែមលើករណីនេះផងដែរ៕

អត្ថបទ៖ ម៉េង