ឃាត់ខ្លួនក្រុមបាតុករ៣នាក់ដែលធ្វើដំណើរចូលមកភ្នំពេញធ្វើបាតុកម្ម(វីដេអូ)

កម្លាំងនគរបាលស្រុកពញាឮ នៃស្នងការដ្ឋាននគរបាលខេត្តកណ្ដាល កាលពីវេលាម៉ោង១០និង២០នាទី ព្រឹកថ្ងៃទី១៨ ខែសីហា ឆ្នាំ២០២៤ បានឃាត់ខ្លួនមនុស្សប្រុសស្រី៣នាក់ ដែលធ្វើដំណើរចូលមកភ្នំពេញ ដើម្បីធ្វើបាតុកម្ម។ ការឃាត់ខ្លួននេះបានធ្វើឡើងនៅលើផ្លូវជាតិលេខ៥ ចំណុចមុខសាលាស្រុកពញាឮ ស្ថិតក្នុងភូមិពោធិ៍តូច ឃុំកំពង់លួង ស្រុកពញាឮ ខេត្តកណ្ដាល បន្ទាប់ពីកម្លាំងឆែករកឃើញវត្ថុតាងមួយចំនួន។

ជនសង្ស័យដែលឃាត់ខ្លួនមាន ១,ឈ្មោះ រ៉ាត់ គឹមសេង ភេទប្រុស អាយុ៣៨ឆ្នាំ មានទីលំនៅបច្ចុប្បន្នភូមិស្វាយ ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។ ២,ឈ្មោះ អេន រី ភេទប្រុស អាយុ៣៨ឆ្នាំ មានទីលំនៅបច្ចុប្បន្នភូមិស្វាយ ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។ ៣,ឈ្មោះ ឈួន មុំ ភេទស្រី អាយុ២៩ឆ្នាំ មានទីលំនៅបច្ចុប្បន្នភូមិស្វាយ ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។

ក្នុងប្រតិបត្តិការឃាត់ខ្លួន សមត្ថកិច្ចបានដកហូតវត្ថុតាងមួយចំនួនដូចជា ជំពាមកៅស៊ូចំនួន ២ គ្រាប់កាំកងចំនួន ៣កញ្ចប់ ម៉ូតូចំនួន ២គ្រឿង កាបូបស្ពាយចំហៀងចំនួន១។ ជនសង្ស័យត្រូវបានបញ្ជូនទៅស្នងការរដ្ឋាននគរបាលខេត្តកណ្ដាល ដើម្បីអនុវត្តនីតិវីធីច្បាប់៕