អគ្គិភ័យឆេះព្រះវិហារក្នុងវត្តផ្ចឹកជ្រុំ សមត្ថកិច្ចប្រើពេល៤ម៉ោងទើបគ្រប់គ្រងបាន

មានការភ្ញាក់ផ្អើលទាំងយប់ថ្ងៃទី២៣ ខែសីហា ឆ្នាំ២០២៤ អំឡុងម៉ោង៩យប់ ចំណុចវត្តផ្ចឹកជ្រុំ ស្ថិតក្នុងភូមិចានទៀប ឃុំសំរោង ស្រុកត្រាំកក់ ខេត្តតាកែវ ដោយអគ្គីភ័យឆេះព្រះវិហារ។

លោកវរសេនីយ៍ឯក ឌុក ធីយ៉ា អធិកានគរបាលស្រុកត្រាំកក់បានឱ្យដឹងថា ពិតជាមានភ្លើងឆេះព្រះវិហារនៅចំណុចខាងលើពិតមែន។ លោកអធិការបន្តថា ក្រោយទទួលដំណឹង លោកបានបញ្ជាកម្លាំងជំនាញ កម្លាំងប៉ុស្តិ៍នគរបាលរដ្ឋបាល សហការជាមួយកម្លាំងសមត្ថកិច្ចពាក់ព័ន្ធ អាជ្ញាធរមូលដ្ឋាន និងប្រជាពលរដ្ឋបានចុះសហការជួយអន្តរាគមន៍ភ្លាមៗ រហូតដល់ម៉ោង១រំលងអាធ្រាត្រទើបភ្លើងរលត់ទាំងស្រុង ដោយប្រើប្រាស់រថយន្តពន្លត់អគ្គិភ័យចំនួន០៥គ្រឿង ប្រើអស់ទឹកចំនួន០៨ឡាន ក្នុងនោះ រថយន្តស្នងការដ្ឋាននគរបាលខេត្តតាកែវ ចំនួន ០២គ្រឿង រថយន្តអធិការដ្ឋាននគរបាលស្រុកត្រាំកក់ ចំនួន ០១គ្រឿង រថយន្តអធិការដ្ឋាននគរបាលស្រុកទ្រាំង ចំនួន ០១គ្រឿង និងរថយន្តអធិការដ្ឋាននគរបាលស្រុកបាទី ចំនួន០១គ្រឿង។

ក្នុងហេតុការអគ្គិភ័យនេះដែរសម្ភារៈដែលខូចខាតមាន ព្រះវិហារឆេះខូចខាតអស់៥០ភាគរយ ទៀនវស្សាចំនួន៣០គូ និងសម្ភារៈផ្សេងៗមួយចំនួន។ បណ្ដាលឱ្យរងរបួសស្រាលមនុស្សប្រុស០២នាក់។ ចំពោះមូលហេតុសមត្ថកិច្ចស្រុកត្រាំកក់បញ្ជាក់ថា បណ្ដាលមកពីព្រះសង្ឃដុតភ្លើងទៀនក្នុងព្រះវិហារ មិនពន្លត់ ទើបឆេះរាលដាលដល់ព្រះវិហារបែបនេះតែម្តងទៅ៕

អត្ថបទ៖ វីរៈ