រដ្ឋបាលខណ្ឌ៧មករា ជួសជុលផ្លូវកៅស៊ូមួយខ្សែប្រវែង២៦៤ម៉ែត្រ សម្រួលដល់ការធ្វើដំណើរពលរដ្ឋ

រដ្ឋបាលខណ្ឌ៧មករា ស្ថាបនាជូសជុលអ៊ុតផ្លូវកៅស៊ូមួយខ្សែប្រវែង ២៦៤ម៉ែត្រ ជូនប្រជាពលរដ្ឋប្រើប្រាស់ឡើងវិញបន្ទាប់ពីខូចខាតជាបន្តបន្ទាប់ ដែលជាកញ្ចប់ថវិកាអភិវឌ្ឍន៍ភូមិឃុំសង្កាត់ឆ្នាំ២០២៤ ដើម្បីសម្រួលដល់ការធ្វើដំណើរ នឹងងាយស្រួលប្រកបអាជីវកម្ម ។

លោក ពាន វាសនា អភិបាលរងខណ្ឌ តំណាងលោក ថេង សុថុល អភិបាល នៃគណៈអភិបាលខណ្ឌ៧មករា បានអញ្ជើញចុះត្រួតពិនិត្យ កំណាត់ផ្លូវលេខ ១១១ និងផ្លូវលេខ១៧០ ស្ថិតនៅភូមិទី១ ភូមិទី២ ភូមិទី៣ ផ្លូវ សង្កាត់​អូរឬស្សីទី១ ខណ្ឌ៧មករា រាជធានីភ្នំពេញ ប្រវែង២៦៤ម៉េត្រ ទទឹង ១១.៧៥ម៉ែត្រកម្រាស់ ៥០មីលីម៉ែត្រ មានផ្ទៃក្រឡា ៣១០២ម៉ែត្រការ៉េ ដែលគិតជាទឹកប្រាក់សរុប ១៧១,៦០០,០០០រៀល ។

លោក ថេង សុថុល អភិបាលនៃគណៈអភិបាលខណ្ឌ៧មករា បានប្រាប់អោយដឹងថា ចំពោះគម្រោងអភិវឌ្ឍន៍ភូមិឃុំសង្កាត់ដែលកំពុងចាប់ផ្តើមជួសជុលនេះ គឺជាកញ្ចប់ថវិកាដេញថ្លៃពីសំណាក់ក្រុមហ៊ុនឯកជន ដើម្បីយកមកជួសជុលផ្លូវខូច ក្នុងមូលដ្ឋានខណ្ឌ៧មករា។ លោកអភិបាលខណ្ឌក៏បានណែនាំឲ្យអាជ្ញាធរសង្កាត់ និងភូមិ ត្រូវជួយបន្តផ្សព្វផ្សាយដល់ប្រជាពលរដ្ឋមានលំនៅដ្ឋានជាប់ផ្លូវ សូមសម្រួលផលប៉ះពាល់ទាំងឡាយដើម្បីអោយក្រុមហ៊ុនងាយស្រួលដំណើរការដ្ឋានជួសជុល។

ក្នុងនោះដែរ លោក ថេង សុថុល បានណែនាំឱ្យក្រុមហ៊ុនទទួលម៉ៅការត្រូវអនុវត្តគម្រោងឱ្យបានល្អ តាមបទដ្ឋានបច្ចេកទេស ធានាបាននូវភាពរឹងមាំ នឹង ទឹកហូត ដើម្បីកាត់បន្ថយភាពលិចលង់ តាមបណ្ដោយផ្លូវនេះឱ្យបាន១០០ភាគរយ៕

អត្ថបទ៖ រដ្ឋា