ចាប់បានចុងស្លាបមាន់បង្កកជាង២តោន ខណៈឈ្មួញ​លួចនាំចូលតាមរថយន្ដពីប្រទេសថៃ

ឈ្មួញ១នាក់បានលួចដឹកចុងស្លាបមាន់បង្កកចំនួន ២០០កេស ស្មើនឹង ២.៤០០ គីឡូក្រាមតាមរថយន្ត១គ្រឿងត្រូវបានសមត្ថកិច្ចចំរុះ មានផលិតកម្ម និងបសុព្យាបាលខេត្តបានហការណ៍ជាមួយអគ្គនាយកដ្ឋានគយបង្រ្កាបអំពើរត់ពន្ធតំបន់៥ ចុះចាប់បាននៅវេលាម៉ោង១ថ្ងៃត្រង់ ថ្ងៃទី២៩ ខែសីហា ឆ្នាំ២០២៤ ស្ថិតក្នុងចំណុចក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។

លោក ហ៊ុយ ទូច ប្រធានការិយាល័យផលិតកម្ម និងបសុព្យាបាលខេត្ត បានប្រាប់ឲ្យដឹងថា ក្រោយពីធ្វើការដកហូត ចុង ស្លាបមាន់បង្កកចំនួន ២០០កេស ស្មើនឹង ២.៤០០ គីឡូក្រាមរួចមក តាមចម្លើយម្ចាស់ទំនិញឈ្មោះ ឈិន សុខាន់ បានប្រាប់ឲ្យដឹងថា ចុងស្លាបមាន់បង្កក ២០០កេសនេះ ខ្លួនបានលួចនាំចូលពីប្រទេសថៃ បង្កប់ដឹកតាមរថយន្ត សាំយ៉ុង យកមកលក់ឲ្យឈ្មួញដើម្បីបន្តលក់ចែកចាយ ក្នុងផ្សារខេត្តបន្ទាយមានជ័យតែម្តង។

លោក ហ៊ុយ ទូច បាននិយាយបញ្ជាក់ឲ្យដឹងបន្តទៀតថា សមត្ថកិច្ចចម្រុះបានធ្វើការដកហូត វត្ថុតាងមានផលិតផល
ចុងស្លាបមាន់បង្កក២០០កេះនេះ បានធ្វើកំណត់ហេតុ និងរកឃើញថា ស្លាបមាន់បង្កកនេះ គឺគ្មានច្បាប់អនុញ្ញាតពីក្រសួងកសិកម្មរុក្ខាប្រមាញ់និងនេសាទ និងអគ្គនាយកដ្ឋានសុខភាពសត្វ និងផលិតកម្មសត្វ ហើយបានពិនិត្យឃើញថា ការវេចខ្ចប់ ការដឹកជញ្ជូន និងការថែរក្សា ផលិតផលទាំងអស់ខាងលើ មិនអនុលោមតាមខ្លឹមសារច្បាប់ ស្ដីពីសុខភាពសត្វ និងផលិតកម្មសត្វ ដែលធ្វើឲ្យបាត់បង់នូវបរិមាណដើម ឬខូចគុណភាព គឺមិនអនុញ្ញាតឲ្យលក់ដូរនៅលើទីផ្សារបានជាដាច់ខាត ព្រោះអាចឲ្យប្រជាពលរដ្ឋទិញយកទៅបរិភោគខូចសុខភាព។

ក្រោយពីធ្វើកំណត់ហេតុ សមត្ថកិច្ចចម្រុះបានឲ្យឈ្មោះ ឈិន សុខាន់ ជាម្ចាស់ទំនិញវត្ថុតាងល្មើស ផ្តិតមេដៃឲ្យឈប់បន្តទិញផលិតកម្មសត្វបង្កកដែលគ្មានគុណភាពបន្តទៀតទុកជាភស្តុតាងទៀតផង។ ចំណែក ផលិតផលសាច់មាន់ចម្រុះរឹបអូស សមត្ថកិច្ចបានយកទៅដុតកម្ទេទចោលនៅចំណុចដីឡូតិ៍ភូមិខ្លាកូន សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ នៅល្ងាចថ្ងៃដដែលផងដែរ៕

អត្ថបទ៖ វ៉ាន់ ណាង