សន្តិសុខសង្គម

វាស់កម្ពស់អាជីវករទិញ-លក់ទូរស័ព្ទម្នាក់ ចេញសែកស្អុយជិត ៤ ម៉ឺនដុល្លារ

បានផុស

៦ ខែ មុន

នៅ

ថ្ងៃសុក្រ ៣០ សីហា ២០២៤

ដោយ

កាលពីថ្ងៃទី ២៩ ខែសីហា ឆ្នាំ ២០២៤ សមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បានឃាត់ខ្លួនអាជីវករទិញ-លក់ទូរស័ព្ទម្នាក់ នៅចំណុចមុខផ្ទះលេខ ១៣៩ E0z ផ្លូវ ១៦៦ សង្កាត់អូរឫស្សីទី ២ ខណ្ឌ ៧ មករា រាជធានីភ្នំពេញ ពីបទ ឆបោក និងមិនបំពេញកាតព្វកិច្ចចំពោះឧបករណ៍អាចជួញដូរបាន។ ពោលគឺចេញសែកស្អុយប្រមាណជិត ៤ ម៉ឺនដុល្លារអាមេរិក ប្រព្រឹត្តនៅចំណុចផ្ទះលេខ ៤៩C ផ្លូវលេខ ២៦១ សង្កាត់បឹងសាឡាង ខណ្ឌទួលគោក រាជធានីភ្នំពេញ កាលពីថ្ងៃទី ១៦ ខែមិថុនា ឆ្នាំ ២០២០ និងថ្ងៃទី ២៨ ខែកុម្ភៈ ឆ្នាំ ២០២០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឃាត់ខ្លួននោះ សមត្ថកិច្ចបានអនុវត្តតាមដីកាបង្គាប់ឲ្យចាប់ និងឃុំខ្លួនលេខ ៦៣៤ «អ» ដ.ច.ន ចុះថ្ងៃទី ០៧ ខែកក្កដា ឆ្នាំ ២០២៣ របស់ លោក ស៊ិន សុវណ្ណរ័ត្ន ចៅក្រមជំនុំជម្រះ នៃសាលាដំបូងរាជធានីភ្នំពេញ។ ជនជាប់ចោទមានឈ្មោះ ហេង វិចិត្រ ភេទប្រុស អាយុ ៤៣ ឆ្នាំ មុខរបរជាអាជីវករ ទិញ-លក់ទូរស័ព្ទ។

តាមប្រភពព័ត៌មានពីសមត្ថកិច្ចបានបង្ហើបឲ្យដឹងថា កាលពីអំឡុងឆ្នាំ ២០២០ ជនសង្ស័យឈ្មោះ ហេង វិចិត្រ បានយកទូរស័ព្ទដៃទំនើបជាច្រើនគ្រឿង ពីដើមបណ្តឹងឈ្មោះ ជា រតនៈ មុខរបរជាអាជីវករលក់ទូរស័ព្ទដូចគ្នា ដែលមានទឹកប្រាក់សរុបប្រមាណជាង ៤ ម៉ឺនដុល្លារអាមេរិក ដើម្បីយកទៅចែកចាយ និងលក់បន្ត។ ក្នុងនោះ ដោយមានការជឿទុកចិត្តគ្នា ពេលនោះជនសង្ស័យមិនទាន់បានទូទាត់ប្រាក់ឲ្យទៅដើមបណ្ដឹងទេ ក្រោយមកម្ចាស់បំណុលក៏បានទារប្រាក់ថ្លៃលក់ទូរស័ព្ទនោះវិញ ហើយជនសង្ស័យក៏បានចេញមូលប្បទានប័ត្រ ១ សន្លឹក ឲ្យទៅដើមបណ្ដឹង ទីបំផុតមូលប្បទានប័ត្រ ១ សន្លឹកនោះ ជាសែកស្អុយ ទើបត្រូវបានដើមបណ្ដឹងប្ដឹងសមត្ថកិច្ចឲ្យជួយចាត់ ការតាមផ្លូវច្បាប់។ ជនសង្ស័យ ត្រូវបានឃាត់ខ្លួន និងវាស់កម្ពស់រួចរាល់ហើយ ហើយនៅព្រឹកនេះ សាលាដំបូងរាជធានីភ្នំពេញ បាននិងកំពុងសាកសួរ៕

អត្ថបទ ៖ មករា