សន្តិសុខសង្គម

ជនសង្ស័យមួយក្រុម វាយប្លន់យុវជន ៣ នាក់ យកម៉ូតូមួយគ្រឿងបានសម្រេច នៅខណ្ឌដង្កោ

បានផុស

៧ ខែ មុន

នៅ

ថ្ងៃចន្ទ ២ កញ្ញា ២០២៤

ដោយ

យុវជន ៣ នាក់ ជិះម៉ូតូឌុបគ្នាត្រលប់ទៅផ្ទះវិញ ខណៈមកដល់ផ្លូវស្ងាត់ ត្រូវជនសង្ស័យមួយក្រុមធ្វើសកម្មភាពវាយប្លន់យកម៉ូតូមួយគ្រឿងបានសម្រេចជិះគេចខ្លួនបាត់ស្រមោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងកាលពីវេលាម៉ោង ៣ ទៀបភ្លឺ ថ្ងៃទី ០២ ខែកញ្ញា ឆ្នាំ ២០២៤ ស្ថិតតាមបណ្ដោយផ្លូវ ២១៧ សង្កាត់ដង្កោ ខណ្ឌដង្កោ រាជធានីភ្នំពេញ។

បើតាមការបញ្ជាក់ពីជនរងគ្រោះបានឲ្យដឹងថា នៅមុនពេលកើតហេតុ ខ្លួន និងមិត្តភ័ក្ដិ បានជិះម៉ូតូ ២ គ្រឿង មានគ្នា ៦ នាក់ ដោយមួយគ្រឿងម៉ាកហុងដាឌ្រីមសង់សេ ១២៥ ពណ៌ខ្មៅ ពាក់ស្លាកលេខ កោះកុង 1C-3138 ជិះឌុបគ្នា ៣ នាក់ និងមួយគ្រឿងទៀត មិនចាំម៉ាក ជិះចេញពីដើរលេងម្ដុំកួរស្រូវត្រឡប់ទៅផ្ទះវិញនៅម្តុំចោមចៅ រួចក៏ធ្វើដំណើរតាមបណ្ដោយផ្លូវ ២១៧។ ពេលជិះមកដល់ចំណុចកើតហេតុផ្លូវស្ងាត់ ស្រាប់តែលេចមុខក្រុមជនសង្ស័យមួយក្រុមមានគ្នាជាច្រើននាក់ មកជិះកាក់ពីមុខ រួចវាយប្លន់យកម៉ូតូឌ្រីមសង់ស៊េរីឆ្នាំ ២០២៤ មួយគ្រឿង បានសម្រេច។ ពេលនោះដែរ ជនសង្ស័យក៏បានទៅគំរាមយកទូរស័ព្ទដៃពីនារីរងគ្រោះម្នាក់ទៀត ដោយនារីរងគ្រោះលើកដៃសំពះទើបជនសង្ស័យយកតែម៉ូតូ ហើយជិះគេចខ្លួនបាត់ស្រមោល។

ក្រោយកើតហេតុជនរងគ្រោះក៏បានទៅប៉ុស្តិ៍នគរបាលសង្កាត់ដង្កោ ដើម្បីដាក់ពាក្យបណ្ដឹងសូមឲ្យសមត្ថកិច្ចធ្វើការស្រាវជ្រាវរកជនសង្ស័យ ដើម្បីឃាត់យកមកចាត់ការតាមនីតិវិធីច្បាប់៕

អត្ថបទ ៖ ម៉េង