ភ្លៀងមួយមេមុននេះ បាក់ដើមឈើសង្កត់​រថយន្ដ​ខូចខាត៤គ្រឿងនៅខណ្ឌដូនពេញ

នៅវេលាម៉ោងជាង២រសៀលថ្ងៃទី៣ ខែកញ្ញាមុននេះ នៅរាជធានីភ្នំពេញមានភ្លៀងធ្លាក់ខ្លាំងលាយឡំដោយខ្យល់កន្ត្រាក់។ ករណីនេះដែរបណ្ដាលឲ្យដើមឈើមួយដើមបាក់សង្កត់លើរថយន្ដចំនួន៤គ្រឿងដែលម្ចាស់ចតទុកចោលបណ្ដាលឲ្យខូចខាតធ្ងន់ធ្ងរចំនួន៣គ្រឿង និងមួយគ្រឿងទៀតខូចខាតបន្តិបន្ទួច។

ករណីនេះបានកើតឡើងនៅលើផ្លូវលេខ២៥៤ ក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ។ ទោះបីយ៉ាងណា ក្នុងហេតុការណ៍បាក់ដើមឈើសង្កត់លើរថយន្ដនេះ មិនបណ្ដាលឲ្យមានអ្នករងរបួសនោះទេ។

យោងតាមការប្រកាសរបស់ក្រសួងធនធានទឹក និងឧតុនិយម បានឲ្យដឹងនៅព្រឹកថ្ងៃទី៣ ខែកញ្ញា ឆ្នាំ២០២៤នេះព្រះរាជាណាចក្រកម្ពុជា នឹងបន្តរងឥទ្ធិពលពីព្យុះទី១១ ឈ្មោះ យ៉ាកជី (Yagi) ចាប់ពីថ្ងៃទី៣ ដល់ថ្ងៃទី៥កញ្ញា ដែលនឹងធ្វើឲ្យតាមបណ្ដារាជធានី ខេត្តមួយចំនួនមានភ្លៀងធ្លាក់លាយឡំជាមួយខ្យល់កន្ត្រាក់ចាប់ពី៤៥ ទៅ៦០ភារយ៕

អត្ថបទ៖ ម៉េង