សន្តិសុខសង្គម

ឃាត់ខ្លួនក្មេងទំនើង ២ ក្រុម មានគ្នា ៨ នាក់ ជាបន្តបន្ទាប់ នៅស្រុកបាទី

បានផុស

៥ ខែ មុន

នៅ

ថ្ងៃពុធ ៤ កញ្ញា ២០២៤

ដោយ

ជនសង្ស័យជាក្មេងទំនើង ៨ នាក់ ត្រូវកម្លាំងនគរបាលស្រុកបាទី ធ្វើការឃាត់ខ្លួនបានជាបន្តបន្ទាប់ កសាងសំណុំរឿងបញ្ជូនទៅកាន់ការិយាល័យកម្រិតស្រាល នៃស្នងការដ្ឋាននគរបាលខេត្តតាកែវដើម្បីចាត់ការបន្ត ក្រោយក្រុមជនសង្ស័យបង្កហិង្សាដាក់គ្នា និងធ្វើឱ្យខូចខាតដោយចេតនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក ឆាយ កែវមុន្នី អធិការនគរបាលស្រុកបាទី បានឱ្យដឹងកាលពីរសៀលថ្ងៃទី ៣ ខែកញ្ញា ឆ្នាំ ២០២៤ នេះថា ក្រុមក្មេងទំនើងទាំង ៨ នាក់ ដែលបានឃាត់ខ្លួន គឺពួកគេបានធ្វើសកម្មភាពល្មើសច្បាប់កាលពីថ្ងៃទី ៣១ ខែសីហា ឆ្នាំ ២០២៤ វេលាម៉ោង ២២ និង ៣០ នាទី នៅភូមិស្មៅខ្ញី ឃុំត្រពាំងសាប ស្រុកបាទី ខេត្តតាកែវ ដែលបង្កឡើងដោយបក្ខពួកក្រុមជនសង្ស័យចំនួន ២ ក្រុម មានគ្នា ៨ នាក់ មានឈ្មោះ ៖

១/.ឈ្មោះ ផាន់ ពៅ ភេទប្រុស អាយុ ១៨ ឆ្នាំ

២/.ឈ្មោះ កុយ ចំណាន ហៅពៅ ភេទប្រុស អាយុ ២២ ឆ្នាំ

៣/.ឈ្មោះ សឿង សន ភេទប្រុស អាយុ ១៨ ឆ្នាំ

៤/.ឈ្មោះ ពេជ្រ ដារ៉ា ហៅស្វិត ភេទប្រុស អាយុ ៣២ ឆ្នាំ

៥/.ឈ្មោះ ប៉ន ប៉ាន់ ហៅប៉ាន់ ភេទប្រុស អាយុ ២៥ ឆ្នាំ

៦/.ឈ្មោះ ស៊ី ដ៉ារា ភេទប្រុស អាយុ ៣៣ ឆ្នាំ

៧/.ឈ្មោះ យុង ណូ ភេទប្រុស អាយុ ៣៧ ឆ្នាំ

៨/.ឈ្មោះ គឹម សុវណ្ណរាជ ភេទប្រុស អាយុ ១៧ ឆ្នាំ។

លោកអធិការបញ្ជាក់ថា ជនសង្ស័យទាំង ២ ក្រុម បានធ្វើសកម្មភាពយកអាវុធដូចជា កាំបិតផ្គាក់ ដំបងឈើ ដំបងដែក និងដុំថ្មជាច្រើន បើកឆាកប្រយុទ្ធគ្នាដេញកាប់ វាយ គប់គ្នាទៅវិញទៅមក និងដុតកម្ទេចម៉ូតូ បណ្តាលឱ្យក្រុមទី ១ ខូចខាតម៉ូតូចំនួន ០១ គ្រឿង ធុនហុងដាឌ្រីមC125 ស៊េរី ២០២៣ ពណ៌ខ្មៅ ពាក់ផ្លាកលេខភ្នំពេញ 1KB-4294 (ខូចខាតយ៉ាងដំណំ) របស់ឈ្មោះ ផាន់ ពៅ ភេទប្រុស អាយុ ១៨ ឆ្នាំ និងរងរបួសបែកមេជើងចំហៀងខាងឆ្វេងចំនួន ០១ កន្លែង ចំណែកឯក្រុមទី ២ ខូចខាតម៉ូតូចំនួន ២ គ្រឿង។ នៅចំពោះមុខកម្លាំងជំនាញក្រុមក្មេងទំនើងបានសារភាពថា ពួកគេពិតជាបានធ្វើការដេញវាយ និងកាប់គ្នាពិតប្រាកដមែន។

លោកវរសេនីយ៍ឯក យ៉ុង ញីវ នាយការិយាល័យព្រហ្មទណ្ឌកម្រិតស្រាល នៃស្នងការនគរបាលខេត្តតាកែវបានឱ្យដឹងដែរថា ជនសង្ស័យ និងវត្ថុតាង ត្រូវបានកម្លាំងជំនាញកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីរួចរាល់ហើយ៕

អត្ថបទ ៖ វីរៈ