សន្តិសុខសង្គម

ម្ចាស់មិននៅផ្ទះ ចោរគាស់ទ្វារចូលលួចម៉ូតូ ៣ គ្រឿង គេចខ្លួនបាត់ នៅខណ្ឌពោធិ៍សែនជ័យ

បានផុស

៧ ខែ មុន

នៅ

ថ្ងៃពុធ ៤ កញ្ញា ២០២៤

ដោយ

ជនសង្ស័យមួយក្រុម បានធ្វើសកម្មភាពគាស់ទ្វារចូលលួចយកម៉ូតូចំនួន ៣ គ្រឿង ខណៈម្ចាស់ផ្ទះមិននៅ តែដោយសារអ្នកជិតខាងមកទាន់ ក៏ប្លុងម៉ូតូចោលមួយគ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កការភ្ញាក់ផ្អើលកាលពីវេលាម៉ោង ៧ ព្រឹក ថ្ងៃទី ៤ ខែកញ្ញា ឆ្នាំ ២០២៤ ស្ថិតនៅភូមិអករំដួល សង្កាត់សំរោងក្រោម ខណ្ឌពោធិ៍សែនជ័យ។

ជនរងគ្រោះឈ្មោះ ម៉ា នីកា ភេទស្រី អាយុ ២៩ ឆ្នាំ មុខរបរលក់អនឡាញ ស្នាក់នៅភូមិអករំដួល សង្កាត់សំរោងក្រោម ខណ្ឌពោធិ៍សែនជ័យ។ ម៉ូតូដែលជនសង្ស័យលួចយកទៅចំនួន ២ គ្រឿង ម៉ាកzoomerx ទាំងពីរគ្រឿង ដោយមួយ ពាក់ស្លាកលេខកណ្តាល 1AA 4799 និងមួយគ្រឿងទៀត មិនចាំស្លាកលេខ។ ដោយឡែកម៉ូតូមួយគ្រឿងទៀតដែលជនសង្ស័យប្លុងចោលនោះ ម៉ាកស្កូបពី ពណ៌ស ស្លាកលេខ ភ្នំពេញ 1FE 2401។

តាមការរៀបរាប់ពីជនរងគ្រោះបានឱ្យដឹងថា កាលពីល្ងាចថ្ងៃទី ៣ កញ្ញា រូបគាត់បានទៅលេងផ្ទះបងនៅឯក្រុងតាខ្មៅ ហើយបានសម្រាកនៅទីនោះ។ លុះវេលាម៉ោង ៣ទៀបភ្លឺ មានបងប្អូនអ្នកជិតខាងបានខលទៅប្រាប់ថា មានឮសំឡេងនៅខាងក្នុងផ្ទះ ពេលនោះរូបគាត់បានប្រាប់ថា គាត់អត់នៅផ្ទះទេ បើមានសំឡេងចេញពីក្នុងផ្ទះមានតែចោរចូល។

ជនរងគ្រោះបានបន្តទៀតថា ពេលនោះរូបគាត់ក៏បានធ្វើដំណើរចេញពីក្រុងតាខ្មៅមកដល់ផ្ទះ ក៏ឃើញទ្វារចំហ ដោយបាត់ម៉ូតូចំនួន ៣ គ្រឿង ទើបឆោឡោឡើងតែម្ដង។

ជនរងគ្រោះបន្ថែមថា លុះវេលាម៉ោង ៧ ព្រឹក ទើបរូបគាត់ដើរស្វែងរកឃើញម៉ូតូមួយគ្រឿងម៉ាកស្កូបពីដែលត្រូវបានជនសង្ស័យប្លុងចោលក្នុងទឹក។ ចំណែក ២ គ្រឿងទៀតជនសង្ស័យយកទៅបាត់។

ក្រោយកើតហេតុសមត្ថកិច្ចបានចុះទៅដល់ចំណុចកើតហេតុសួរនាំ និងឆែកកាមេរ៉ាសុវត្ថិភាព ហើយនាំជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលសំរោងក្រោម៕

អត្ថបទ ៖ សុខា