សន្តិសុខសង្គម

បុរសម្នាក់ បើករថយន្តក្នុងស្ថានភាពស្រវឹង បុករះរថយន្ត ២ គ្រឿង រួចព្យាយាមបើករត់ តែត្រូវភាគីរងគ្រោះប្រដេញឃាត់បានវិញ

បានផុស

៤ ខែ មុន

នៅ

ថ្ងៃពុធ ៤ កញ្ញា ២០២៤

ដោយ

បុរសម្នាក់ បើករថយន្ត Camry យ៉ាងលឿន ក្នុងស្ថានភាពស្រវឹង បុករះរថយន្តចំនួន ២ គ្រឿងទៀត រួចព្យាយាមបើករត់ តែត្រូវភាគីម្ចាស់រថយន្តរងគ្រោះប្រដេញឃាត់បានវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងកាលពីវេលាម៉ោង ៨ និង ៣០ នាទី យប់ថ្ងៃទី ៣ ខែកញ្ញា ឆ្នាំ ២០២៤ ស្ថិតនៅលើផ្លូវជាតិលេខ ១ សង្កាត់ច្បារអំពៅទី ២ ខណ្ឌច្បារអំពៅ រាជធានីភ្នំពេញ។

បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញមានរថយន្តមួយគ្រឿង ម៉ាក Ford ពណ៌ស ពាក់ផ្លាកលេខ ភ្នំពេញ 2BV-9908 បើកបរដោយបុរសម្នាក់ រួមដំណើរជាមួយមនុស្ស ២ នាក់ទៀត ធ្វើដំណើរតាមបណ្ដោយផ្លូវជាតិលេខ ១ ទិសដៅពីកើតមកលិច ខណៈបើកមកដល់ចំណុចកើតហេតុ ក៏បង្អង់ល្បឿនឈប់រង់ចាំស្តុបក្រហម ភ្លាមនោះដែរ ស្រាប់តែគេឃើញរថយន្តបង្កម៉ាកកាមរីហាយប្រ៊ីត ពណ៌ស ពាក់ផ្លាកលេខ ភ្នំពេញ 2BY-0621 បើកបរដោយបុរសម្នាក់ ធ្វើដំណើរមកពីក្រោយស្របទិសគ្នាពីកើតមកលិចក្នុងល្បឿនយ៉ាងលឿន ទាំងស្ថានភាពស្រវឹងស្រាជោកជាំ ក៏ជ្រុលទៅបុកពីក្រោយរថយន្តស៊េរីទំនើបម៉ាក ford យ៉ាងពេញទំហឹង បណ្ដាលឲ្យរងការខូចខាតយ៉ាងដំណំ ហើយរថយន្តបង្កមិនព្រមឈប់ដោះស្រាយ ក៏បន្តល្បឿនបើករត់រហូតមកដល់ចំណុចគល់ស្ពានច្បារអំពៅ ក៏ជ្រុលទៅបុករថយន្តស៊េរីទំនើបមួយគ្រឿងទៀត ម៉ាក JA CUAR ពណ៌ខ្មៅ ពាក់ផ្លាកលេខកម្ពុជា TLN.666 បើកបរដោយនារីម្នាក់ ចំពីក្រោយពេញទំហឹង បណ្ដាលឲ្យរងការខូចខាត។ ទោះយ៉ាងណា រថយន្តបង្ក មិនព្រមឈប់ដោះស្រាយ នៅបន្តល្បឿនបើករត់រហូតមកដល់ចំណុចក្រោមស្ពានអាកាស ៦០ ម៉ែត្រ បានបួងចង្កូតជ្រុលទៅបុកគំនរថ្ម និងគម្របលូ ទើបទៅមុខលែងរួច។

ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ រួចទាក់ទងទៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ចុះមកវាស់វែងយករថយន្តទៅរក្សាទុក រង់ចាំការដោះស្រាយនៅពេលក្រោយ៕

អត្ថបទ ៖ ម៉េង