នគរបាលព្រហ្មទណ្ឌស្រាវជ្រាវឃាត់ខ្លួនស្រី្ដម្នាក់ ក្រោយបែកធ្លាយវីដេអូហិង្សាគំរាមសម្លាប់លើស្ត្រីម្នាក់

កម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ កាលពីថ្ងៃទី១០ ខែកញ្ញា ឆ្នាំ២០២៤ បានស្រាវជ្រាវឃាត់ខ្លួនស្រ្តីម្នាក់ ក្រោយប្រើហិង្សា និងគំរាមសម្លាប់លើស្ត្រីម្នាក់កាលពីថ្ងៃទី១១ ខែសីហា កន្លងទៅនៅចំណុចខុនដូរ Parkland តាមបណ្តោយផ្លូវលេខ១៩២៨ ភូមិគង្គាផុស សង្កាត់ទួលសង្កែទី២ ខណ្ឌឫស្សីកែវ។

ការស្រាវជ្រាវឃាត់ខ្លួននេះ បានធ្វើឡើងនៅចំណុចផ្ទះលេខ ៣៦ប៊េ តាមផ្លូវលេខ៩៩ ក្នុងសង្កាត់បឹងត្របែក ខណ្ឌចំការមន បន្ទាប់អំពើហិង្សា និងការគំរាមសម្លាប់នេះបានបែកធ្លាយនៅលើបណ្ដាញសង្គម និងមានការចែករំលែកជាច្រើនទៀតផង។

បើតាមការបញ្ជាក់ពីសមត្ថកិច្ចប្រាប់អោយដឹងថា ការឃាត់ខ្លួនស្ត្រីសង្ស័យនេះ គឺធ្វើឡើងដោយមានការបញ្ជាពីឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានអោយកម្លាំងការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងអធិការដ្ឋាននគរបាលខណ្ឌឫស្សីកែវ បើកការស្រាវជ្រាវស្វែងរកនារីជើងខ្លាំងរូបនោះ បន្ទាប់ពីប្រើហិង្សា ថែមទាំងគំរាមសម្លាប់លើនារីរងគ្រោះថែមទៀត។

រហូតដល់ថ្ងៃទី១០ ខែកញ្ញា ឆ្នាំ២០២៤ ទើបសមត្ថកិច្ចស្វែងរកឃើញនូវទីតាំងផ្ទះរបស់នារីជាជនសង្ស័យខាងលើ និងឈានដល់ការឃាត់ខ្លួនបាននៅចំណុចខាងមុខផ្ទះលេខ ៣៦ប៊េ ក្នុងសង្កាត់បឹងត្របែក ខណ្ឌចំការមន។ ជនសង្ស័យត្រូវបានសមត្ថកិច្ចកំពុងសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕

អត្ថបទ៖ ម៉េង