ចៅសង្កាត់ផ្សារចាស់ ស្នើឲ្យក្រុមហ៊ុនម៉ៅការផ្លាស់ប្ដូរប្រព័ន្ធលូ ត្រូវអ៊ុតផ្លូវកៅស៊ូ និងរៀបការ៉ូឡាឲ្យស្អាតឡើងវិញ

លោក លី សុខុន ចៅសង្កាត់ផ្សារចាស់ នៃរដ្ឋបាលខណ្ឌដូនពេញ បានស្នើដល់អាជ្ញាធរខណ្ឌ ជាពិសេសក្រុមហ៊ុនម៉ៅការផ្លាស់ប្ដូរប្រព័ន្ធលូ ត្រូវអ៊ុតកៅស៊ូផ្លូវ និងរៀបចំការ៉ូឡាឲ្យស្អាតឡើងវិញ បន្ទាប់ពីកាយដាក់ប្រព័ន្ធលូរួចរាល់។ ការលើកឡើងរបស់លោកចៅសង្កាត់នេះ គឺធ្វើឡើងស្របតាមសំណូមពររបស់ប្រជាពលរដ្ឋ ព្រោះកន្លងមកពេលកាយដាក់ប្រព័ន្ធលូរួចរាល់ ពុំដែលឃើញធ្វើឲ្យស្អាតឡើងវិញនោះ។

លោកចៅសង្កាត់បានបញ្ជាក់ថា ការយកចិត្តទុកដាក់របស់សង្កាត់ ជាមួយប្រជាពលរដ្ឋដើម្បីឲ្យពលរដ្ឋទទួលបានសន្តិសុខ​សណ្ដាប់ធ្នាប់ល្អ ជាពិសេសការអភិវឌ្ឍន៍ហេដ្ឋារចនាសម្ព័ន្ធក្នុងមូលដ្ឋានសង្កាត់ និងជាគម្រោងថវិការរបស់សង្កាត់ដោយបានអ៊ុតកៅស៊ូតាមដងផ្លូវសំខាន់ៗ និងរៀបការរ៉ូឡាថ្មីជូនតាមមុខផ្ទះពលរដ្ឋផងដែរ។

ការលើកឡើងរបស់លោកចៅសង្កាត់ផ្សារចាស់ ធ្វើឡើងក្នុងវេទិកាផ្សព្វផ្សាយ និងពិគ្រោះយោបល់ សម្រាប់អាណត្តិទី៤ ឆ្នាំ២០២៤ របស់រដ្ឋបាលខណ្ឌដូនពេញ ក្រោមអធិបតីភាពលោក ហែម អាន ប្រធានក្រុមប្រឹក្សាខណ្ឌដូនពេញ និងលោក ជា ខេមា អភិបាល នៃគណៈអភិបាលខណ្ឌដូនពេញ នាព្រឹកថ្ងៃទី១២ ខែកញ្ញា ឆ្នាំ២០២៤នេះ។

លោក ជា ខេមា អភិបាលនៃគណៈអភិបាលខណ្ឌដូនពេញ បានទទួលយកនៅសំណូមពររបស់លោកចៅសង្កាត់ ហើយក៏បានលើកឡើង ហើយក៏បានសំណូមពរ និងអធ្យាស្រ័យដល់ប្រជាពលរដ្ឋ ដោយសារអំឡុងពេលការដ្ឋានកំពុងសាងសង គឺមានផលប៉ះពាល់ខ្លះ តែទោះយ៉ាងលោកអភិបាលខណ្ឌក៏បានឲ្យមន្រ្តីជំនាញត្រួតពិនិត្យមើលបន្ថែម
តាមលក្ខណៈបច្ចេកទេសឲ្យបានត្រឹមត្រូវ និងឲ្យរៀបចំក្រោយពេលការដ្ឋានរួចរាល់ឲ្យបានស្អាតវិញ៕

អត្ថបទ៖ សុភា