អាជ្ញាធរខណ្ឌពោធិ៍សែនជ័យ ចុះបង្ក្រាបទីតាំងបង្កប់ល្បែងខុសច្បាប់ក្រោយណែនាំមិនស្ដាប់

កម្លាំងគណបញ្ជាការឯកភាពខណ្ឌពោធិ៍សែនជ័យ នារសៀលថ្ងៃទី១២ ខែកញ្ញា ឆ្នាំ២០២៤នេះ បានចុះបង្ក្រាបទីតាំងតារ៉ាងបាល់ទះ និងស្នូកឃ័រមួយកន្លែងដែលលួចបង្កប់ល្បែងស៊ីសងតាមអនឡាញខុសច្បាប់ បន្ទាប់ពីណែនាំមិនស្ដាប់។

ការចុះបង្ក្រាបនេះធ្វើនៅចំណុចតារ៉ាងបាល់ទះមួយកន្លែង ក្នុងភូមិត្រពាំងថ្លឹង៣ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ដោយបានដកហូតសម្ភារបម្រើឲ្យល្បែងស៊ីសងអនឡាញមួយចំនួន។

តាមអាជ្ញាធរបានឱ្យដឹងថា កន្លងមកអាជ្ញាធរសង្កាត់ ខណ្ឌ ធ្លាប់បានចុះទៅធ្វើការអប់រំ ណែនាំរួចមកហើយដោយមិនឲ្យមានការបើកលេងនូវល្បែងសុីសងខុសច្បាប់នោះទេ តែម្ចាស់ទីតាំងមិនបានស្ដាប់តាមការណែនាំរបស់អាជ្ញាធរនោះទេ បែជាលួចបើកលេងល្បែងស៊ីសងអនឡាញ ទើបកម្លាំងចុះបង្ក្រាបតែម្ដង។ ក្រោយពីដកហូតបានសម្ភារៈទាំងនោះ កម្លាំងអាជ្ញាធរប្រមូលយកទៅរក្សាទុកនៅសាលាខណ្ឌពោធិ៍សែនជ័យ ដើម្បីអនុវត្តតាមនីតិវិធី៕

អត្ថបទ៖ សុខា