អាជ្ញាធរសង្កាត់អូរឬស្សីទី១ ចុះពិនិត្យ និងផ្លាស់​ប្ដូរការ៉ូឡាថ្មីដើម្បីលើកស្ទួយសោភ័ណ្ឌភាពដងផ្លូវ

រដ្ឋបាលសង្កាត់អូរឬស្សីទី១ ខណ្ឌ៧មករា បានផ្លាស់ប្ដូរការ៉ូឡាថ្មីនៅតាមចិញ្ចើមផ្លូវដើម្បីលើកសោភ័ណ្ឌភាពតាមដងផ្លូវនិងសម្រាប់ពលរដ្ឋងាយស្រួលធ្វើដំណើរថ្មើរជើងផងដែរ។ ចិញ្ជើមផ្លូវលេខ១០៩ រហូតទៅដល់ស្តុបអូតែលស ស្ថិតក្នុងសង្កាត់អូរឬស្សីទី១ ខណ្ឌ៧មករា ត្រូវបានផ្លាស់ប្ដូរការ៉ូឡាថ្មី ដោយការ៉ូឡាចាស់ បាក់បែកខូចខាតអស់ធ្វើឲ្យបាត់បង់សោភ័ណ្ឌភាព។

លោក រីទ្ធីពុល អ្នករស់នៅបណ្ដោយផ្លូវលេខ១០៩នេះបានសម្តែងក្តីរីករាយ ពេលឃើញអាជ្ញាធរយកចិត្តទុកដាក់ យល់ពីសុខទុក្ខប្រជាពលរដ្ឋក្នុងមូលដ្ឋានបែបនេះ។ ពលរដ្ឋបន្តទៀតថា អាជ្ញាធរបានចុះមកជួសជុល និងផ្លាស់ប្តូរនូវការ៉ូឡាចាស់ ដែលបាក់បែក ដើម្បីលើកភាពស្រស់ស្អាតតាមដងផ្លូវលេខ១០៩នេះ ក៏ដូចជាសោភ័ណ្ឌភាពតាមខាងមុខផ្ទះប្រជាពលរដ្ឋផងដែរ។

លោក នៅ ប៊ុន ចៅសង្កាត់អូរឬស្សីទី១ បានឲ្យដឹងថា ដោយឃើញថាការ៉ូឡានៅចិញ្ជើមផ្លូវ ១០៩ មានសភាពចាស់ទ្រុឌទ្រោម ខូចខាតស្ទើរទាំងស្រុងទៅហើយ ទើបលោកសម្រេចផ្លាស់ប្តូរនៅការ៉ូឡាថ្មីតែម្តង។ ហើយចំពោះថវិកាផ្លាស់ប្ដូរការ៉ូឡាថ្មីនេះ ជាកញ្ចប់ទឹកប្រាក់ដែលបានមកពីការដេញថ្លៃពីក្រុមហ៊ុនឯកជន ដើម្បីយកមកអភិវឌ្ឍន៍សង្កាត់ឆ្នាំ២០២៤។

ជាមួយគ្នានេះដែរ លោកចៅសង្កាត់អូរឬស្សីទី១ ក៏បានបន្ថែមថា ដើម្បីលើកកម្ពស់សោភ័ណ្ឌភាពតាមដងផ្លូវផង ងាយស្រួលដល់ពលរដ្ឋក្នុងការធ្វើដំណើរដោយថ្មើរជើង និងបង្ការគ្រោះថ្នាក់ផ្សេងៗផង លោកក៏បានណែនាំដល់មន្ត្រីជំនាញពាក់ព័ន្ធត្រូវត្រួតពិនិត្យតាមការដ្ឋានទាំងអស់នៅក្នុងមូលដ្ឋានដើម្បីបញ្ជាក់ថា ពិតជាមានលក្ខណៈបច្ចេកទេសត្រឹមត្រូវក្នុងការដ្ឋាន៕

អត្ថបទ៖ រដ្ឋា