ពលរដ្ឋខកចិត្ត ក្រោយអាជ្ញាធរផ្អាកការដ្ឋានដាក់​លូបញ្ចៀសទឹកជំនន់ទៅស្ទឹងព្រែកត្នោត

នៅពេលថ្មីៗនេះប្រជាពលរដ្ឋរស់នៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ បានខកចិត្តគ្រប់ៗគ្នា ខណៈដែលការដ្ឋានជីកដាក់លូបង្ហូរទឹកចេញពីសង្កាត់ចាក់អង្រែក្រោមឆ្ពោះទៅស្ទឹងព្រែកត្នោត ដើម្បីបញ្ចៀសការលិចលង់លំដ្ឋានបែជាត្រូវផ្អាកឈប់ដំណើរការ។

ប្រជាពលរដ្ឋបាននិយាយថា ក្នុងអំឡុងខែមិថុនា ឆ្នាំ២០២៤កន្លងទៅ គេបានឃើញអាជ្ញាធរដែនដីខណ្ឌ និងសាលារាជធានីភ្នំពេញ បានចុះមកពិនិត្យ និងបើកការដ្ឋានជីកដាក់លូបង្ហូរទឹកចេញពីតំបន់ផ្លូវ៦០ម៉ែត្រ ក្នុងនោះមានសង្កាត់ចាក់អង្រែក្រោម និងសង្កាត់ចាក់អង្រែលើ ខណ្ឌមានជ័យ ធ្វើឲ្យប្រជាពលរដ្ឋនាំគ្នាសប្បាយចិត្តព្រោះលែងព្រួយបារម្មណ៍នឹងការលិចលង់ផ្ទះសម្បែងតទៅទៀត។ ប៉ុន្តែសកម្មភាពបើកការដ្ឋានរៀបចំដាក់ប្រពន្ធ័លូខ្នាតធំនេះបែជាផ្អាកទៅវិញដោយពុំដឹងមូលហេតុ។

លោក ជា សុខៃ ចៅសង្កាត់ចាក់អង្រែក្រោម បានឲ្យ កម្ពុជាថ្មី ដឹងនៅរសៀលថ្ងៃទី២០ ខែកញ្ញានេះថា ចំពោះបញ្ហាផ្អាកសកម្មភាពជីកដាក់លូខ្នាតធំមុខកាត់២ម៉ែត្រខាងលើនេះ ពិតជាមានមែន ហើយលោកក៏ពុំដឹងមូលហេតុដែរ។ លោក ជា សុខៃ បានបន្តថា លូខ្នាតធំដែលត្រូវជីកសម្រាប់រំដោះទឹកចេញពីសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញទម្លាក់ទៅអូរស្ទឹងជ្រៅបង្ហូរទៅស្ទឹងព្រែកត្នោត ក្នុងភូមិសាស្ត្រខេត្តកណ្តាលនេះ គឺមានប្រវ៉ែង១៦៥០ម៉ែត្រ។ ហើយបើសិនជាការជីកដាក់លូបង្ហូរទឹកខ្នាតធំនេះអាចសម្រេចបាននោះ​ គឺទឹកដីសង្កាត់ចាក់អង្រែក្រោមនឹងលែងព្រួយបារម្មណ៍រឿងលិចទឹកទៀតហើយ ប៉ុន្តែបច្ចុប្បន្នក្រុមជំនាញបានដឹកលូយកមកទុកលើការដ្ឋានដែលត្រូវជីកដាក់រួចរាល់តាំងពីថ្ងៃទី២៦ ខែមិថុនា ឆ្នាំ២០២៤មកម្ល៉េះ តែសកម្មភាពជីកដាក់លូ គឺបានផ្អាកបាត់ទៅហើយ៕

អត្ថបទ៖ នរា