សន្តិសុខសង្គម

ឃាត់ខ្លួនជនសង្ស័យម្នាក់ ក្រោយកាន់កាំបិតចូលកាប់គូទំនាស់ដល់ក្នុងផ្ទះ

បានផុស

៥ ខែ មុន

នៅ

ថ្ងៃអង្គារ ២៤ កញ្ញា ២០២៤

ដោយ

នគរបាលខណ្ឌច្បារអំពៅ ឃាត់ខ្លួនជនសង្ស័យម្នាក់ ក្រោយធ្វើសកម្មភាពកាន់កាំបិតចូលកាប់គូទំនាស់ត្រូវកំភួនដៃខាងឆ្វេង ដែលធ្លាប់ទាស់ពាក្យសម្ដីគ្នា កាលពីអំឡុងខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងកាលពីយប់ថ្ងៃទី ២៣ ខែកញ្ញា ឆ្នាំ ២០២៤ វេលាម៉ោង ១៨ និង ២០ នាទី នៅផ្ទះលេខ ៧៤ ផ្លូវ ៦៥៤ ភូមិជ្រោយបាសាក់ សង្កាត់ព្រែកប្រា ខណ្ឌច្បារអំពៅ។

នគរបាលបានឲ្យដឹងថា ជនរងគ្រោះឈ្មោះ ពេញ ហ៊ាង ភេទប្រុស អាយុ ៦៨ ឆ្នាំ មុខរបរបើកបររថយន្ត ស្នាក់នៅផ្ទះកើតហេតុ។ រីឯជនសង្ស័យឃាត់ខ្លួនឈ្មោះ ហឿន សុខខន ភេទប្រុស អាយុ ៤២ ឆ្នាំ ជនជាតិខ្មែរ មុខរបរលក់ដូរ ស្នាក់នៅភូមិជ្រោយបាសាក់ សង្កាត់ព្រែកប្រា ខណ្ឌច្បារអំពៅ។

នគរបាលបានបន្តថា កាលពីអំឡុងខែសីហា ឆ្នាំ ២០២៤ ជនរងគ្រោះមានទំនាស់ពាក្យសម្ដីជាមួយជនសង្ស័យ។ លុះដល់វេលាម៉ោងកើតហេតុ ជនរងគ្រោះកំពុងនៅផ្ទះកើតហេតុ ស្រាប់តែជនសង្ស័យជិះម៉ូតូមកឈប់មុខផ្ទះជនរងគ្រោះ រួចដើរចូលយកកូនកាំបិតដេញចាក់ជនរងគ្រោះត្រូវកំភួនដៃខាងឆ្វេង ១ កន្លែង។ ក្នុងនោះ ជនរងគ្រោះ ត្រូវបានក្រុមគ្រួសារស្រែកឲ្យគេជួយ រួចជនសង្ស័យក៏ជិះម៉ូតូគេចខ្លួន។

លុះដល់ម៉ោង ២២ និង ៣០ នាទី ថ្ងៃដដែល សមត្ថកិច្ចខណ្ឌច្បារអំពៅ សហការជាមួយកម្លាំងការិយាល័យព្រហ្មទណ្ឌកម្រិតស្រាល បានធ្វើការឃាត់ខ្លួនជនសង្ស័យ និងវត្ថុតាងកូនកាំបិត ២ បញ្ជូនមកអធិការដ្ឋាននគរបាលខណ្ឌច្បារអំពៅសាកសួរតែម្ដង៕

អត្ថបទ ៖ សំណាង