អាវុធហត្ថខណ្ឌចំការមន ឡោមព័ទ្ធឃាត់ខ្លួនជន​ជាតិចិន៦នាក់ ក្រោយព្រួតចាក់សម្លាប់ជន​ជាតិ​ចិនម្នាក់

កម្លាំងកងរាជអាវុធហត្ថខណ្ឌចំការមន បានធ្វេីការឡោមព័ទ្ធឃាត់ខ្លួនជនសង្ស័យជាជនជាតិចិន៦នាក់ បន្ទាប់ពីព្រួតគ្នាបង្កហិង្សា និងប្រេីអាវុធចុងស្រួចចាក់ទៅលេីបុរសជនជាតិចិនម្នាក់រហូតស្លាប់នៅកន្លែងកើតហេតុ។ ករណីហិង្សារវាងជនជាតិចិន និងជនជាតិចិនរហូតមានបាត់បង់ជីវិតនេះ បានកើតឡើងកាលពីវេលាម៉ោង១រំលងអធ្រាត្រ ឈានចូលថ្ងៃទី២៥ ខែកញ្ញា ឆ្នាំ២០២៤ ស្ថិតនៅតាមបណ្តោយមហាវិថីព្រះនរោត្តម ទល់មុខអគារព្រីនស៍ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញមានជនជាតិចិន១ក្រុមមានគ្នា៦នាក់ បានឈ្លោះប្រកែកគ្នាជាមួយបុរសជាតិចិនម្នាក់ទាំងកំហឹង រហូតបាននាំគ្នាព្រួតវាយដំជាន់ធាក់ និងប្រេីអាវុធចុងស្រួចចាក់ទៅលើបុរសជនជាតិចិនរងគ្រោះម្នាក់នោះបណ្ដាលឲ្យស្លាប់នៅកណ្ដាលផ្លូវតែម្ដង ទេីបបង្កការភ្ញាក់ផ្អើលយ៉ាងខ្លាំងដល់ប្រជាពលរដ្ឋ រាយការណ៍ជូនសមត្ថកិច្ចភ្លាមៗដើម្បីជួយអន្តរាគមន៍។

ក្រោយទទួលបានព័ត៌មានខាងលេីភ្លាម កម្លាំងកងរាជអាវុធហត្ថខណ្ឌចំការមន បានចុះទៅដល់កន្លែងកេីតហេតុ និងបានធ្វើការឡោមព័ទ្ធឃាត់ខ្លួនជនសង្ស័យដែលជាប់ពាក់ព័ន្ធសរុប០៦នាក់ យកទៅការិយាល័យកងរាជអាវុធហត្ថរាជធានីភ្នំពេញ ដើម្បីសាកសួរ និងអនុវត្តបន្តតាមនីតិវិធីច្បាប់។

ពាក់ព័ន្ធករណីនេះ សមត្ថកិច្ចនៅមិនទាន់អាចបញ្ជាក់បាននៅឡើយនោះទេថា បង្កឡេីងព្រោះរឿងអ្វី។ ចំណែក​សព​ជនរង​គ្រោះ ត្រូវបានសមត្ថកិច្ចជំនាញធ្វើការហ៊ុមព័ទ្ធខ្សែ និងធ្វេីការស្រាវជាវរកសាច់ញាតិក្រុមគ្រួសារមកទទួលយកទៅធ្វើបុណ្យតាមប្រពៃណី៕

អត្ថបទ៖ សុខា