ឆេះផ្ទះស្តុកគ្រឿងកង្ហារខូចខាតសម្ភារគិតជាទឹកប្រាក់សរុប ២០មុឺនដុល្លារ

ផ្ទះស្ដុកគ្រឿងជ័រកង្ហារត្រូវបានអគ្គិភ័យឆាបឆេះយ៉ាងសន្ធោរសន្ធៅបណ្ដាលឲ្យខូចខាតសម្ភារសរុបជាទឹកប្រាក់ប្រហែល២០ម៉ឺនដុល្លារ ខណៈម្ចាស់ផ្ទះចាក់សោទុកចោលចេញវត្ត។

ហេតុការណ៍នេះបានកើតឡើងនៅវេលាម៉ោង១១ព្រឹក ថ្ងៃទី២៥ ខែកញ្ញា ឆ្នាំ២០២៤ ចំណុចផ្ទះលេខ ៦២ ផ្លូវលេខ០៤ ក្នុងបុរីពិភពថ្មី៣ ភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ។

បើតាមប្រភពព័ត៍មានពីប្រជាពលរដ្ឋបានអោយដឹងថា គេឃើញមានផ្សែងខ្មៅហុយចេញពីក្នុងផ្ទះកើតហេតុ។ ភ្លាមៗប្រជាពលរដ្ឋបានជួយយកបំពង់ពន្លត់អគ្គិភ័យបាញ់ទប់ស្កាត់អស់ជាច្រើនបំពង់នៅតែមិនអាចទប់ស្កាត់បាន ទើបរាយការណ៍ទៅសមត្ថកិច្ចជំនាញពន្លត់អគ្គិភ័យ ជួយអន្តរាគមន៍អោយទាន់ពេលវេលាជៀសវាងមានការរាលដាលកាន់តែខ្លាំង។

ប្រភពពីម្ចាស់ផ្ទះបានឲ្យដឹងថា មុនពេលកើតហេតុ កាលពីព្រឹកម៉ោង៦ គាត់បានរៀបចំអុជធូបសែននៅក្នុងផ្ទះ។ លុះមកដល់វេលាម៉ោង០៩ គាត់ក៏បានចាក់សោផ្ទះចេញទៅវត្ត ប៉ុន្តែខណៈកំពុងធ្វើដំណើរមិនទាន់បានទៅដល់វត្តផង ក៏ស្រាប់តែមានអ្នកក្បែរខាងទូរស័ព្ទមកប្រាប់គាត់ថា «ផ្ទះគាត់ភ្លើងឆេះ» ។ ភ្លាមៗ គាត់ក៏បានបកត្រឡប់ក្រោយមកផ្ទះវិញតែម្តង។

ក្នុងគ្រោះអគ្គិភ័យនេះ បានឆាបឆេះនូវគ្រឿងជ័របង្គុំកង្ហារអស់២មុឺនគ្រឿង គិតជាទឹកប្រាក់ចំនួន ២០មុឺនដុល្លារ និងបានប្រើប្រាស់រថយន្តពន្លត់អគ្គិភ័យរបស់ស្នងការរាជធានី ចំនួន០៣គ្រឿង រថយន្តជំនួយអន្តរាគមន៍របស់ ស្រាបៀរកម្ពុជា​០១គ្រឿង និងរថយន្តទឹកស្រោចផ្កាបុរីពិភពថ្មី ០១គ្រឿង បាញ់ពន្លត់រហូតរលត់ជាស្ថាពរ។ ចំពោះមូលហេតុ សមត្ថកិច្ចកំពុងស្រាវជ្រាវ៕

អត្ថបទ៖ ម៉េង