កម្លាំងជលផលអន្លង់វិល ចុះបង្ក្រាបបទល្មើសនេសាទ៣កន្លែងក្នុងភូមិសាស្ត្រស្រុកមោងឫស្សី

ទីតាំងបទល្មើសនេសាទ ៣កន្លែងត្រូវបានកម្លាំងជលផលអន្លង់វិល សហការជាមួយគណៈបញ្ជាការឯកភាពស្រុកមោងឬស្សី និងសហគមន៍ចុះបង្ក្រាប ដែលទីតាំងទាំងនោះស្ថិតនៅក្នុងឃុំកកោះ និងឃុំព្រៃតូច ស្ថិតក្នុងភូមិសាស្ត្រស្រុកមោងឫស្សី។

លោក បឿង សុវណ្ណ អភិបាលរងស្រុកមោងឬស្សី បានបញ្ជាក់ថា កម្លាំងអាជ្ញាធរបានសហការជាមួយកម្លាំងជំនាញរួមទាំងសហគមន៍បានចុះបង្ក្រាបបទល្មើសនេសាទខុសច្បាប់ដែលពួកគេបានប្រព្រឹត្តឡើងនៅក្នុងភូមិសាស្ត្រខាងលើ។ កិច្ចប្រតិបត្តិការនេះបានធ្វើឡើងចំនួន ២ថ្ងៃ គឺថ្ងៃទី២៣ និងថ្ងៃទី២៦ ខែកញ្ញា ឆ្នាំ២០២៤ និងបន្តធ្វើបន្ថែមទៀតដោយកម្លាំងបានប្រើប្រាស់កាណូតស្មាច់ចំនួន ៥គ្រឿង និងកម្លាំងចម្រុះចំនួន ១៩នាក់។

លោកអភិបាលរងស្រុកបានបន្ថែមថា ទីតាំងទាំង៣ខាងលើដែលកម្លាំងចម្រុះចុះបង្ក្រាប គឺស្ថិតនៅចំណុច ស្បូវឃ្លាំង ចំណុចអាជ្រឹង និងចំណុចបឹងយាយរាំ ស្ថិតក្នុងភូមិសាស្ត្រឃុំកកោះ និងឃុំព្រៃតូច ស្រុកមោងឬស្សី ខេត្តបាត់ដំបង ដែលក្នុងនោះកម្លាំងចម្រុះបានកម្ទេចឡុកចាប់ត្រីចំនួន ៦ សាច់ម៉ងប្រវែង១.២៥០ ម៉ែត្រ និងបង្គោលចំនួន ៤៨០ ដើម ព្រមទាំងបានលែងកូនត្រីចូលក្នុងបឹងទន្លេសាបវិញជាង ៣០គីឡូក្រាម។

គួរបញ្ជាក់ថា កន្លងមកកម្លាំងមន្ត្រីជលផល និងកម្លាំងអាជ្ញាធរចម្រុះបានចុះប្រតិបត្តិការបង្ក្រាបបទល្មើសនេសាទលើផ្ទៃទឹកនៃបឹងទន្លេសាបជាញឹកញាប់ ប៉ុន្តែបទល្មើសនៅតែកើតមានឡើងជាបន្តបន្ទាប់ ជាពិសេសនៅរដូវត្រីពងកូននេះដែលជាការហាមឃាត់លើការនេសាទគ្រប់ប្រភេទ៕

អត្ថបទ៖ សោ និយមរ័ត្ន