សន្តិសុខសង្គម

Update ៖ អគ្គិភ័យឆេះឃ្លាំងស្តុកកង់អគ្គិសនីអស់ជិត ៤ ពាន់គ្រឿង ប្រើរថយន្តពន្លត់អគ្គិភ័យជិត ៣០ គ្រឿង

បានផុស

៦ ខែ មុន

នៅ

ថ្ងៃសុក្រ ២៧ កញ្ញា ២០២៤

ដោយ

អ៊ិន ពិសី

ឃ្លាំងស្តុកកង់ប្រមាណជិត ៤ ០០០ គ្រឿង ត្រូវបានអគ្គិភ័យលេបត្របាក់ ខូចខាតសម្ភារៈខាងក្នុងទាំងស្រុងត្រឹមមួយប៉ប្រិចភ្នែក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រោះអគ្គិភ័យនេះកើតឡើងកាលពីវេលាម៉ោង ០៥ និង ៤០ នាទីល្ងាច ថ្ងៃទី ២៦ ខែកញ្ញា ឆ្នាំ ២០២៤ ស្ថិតតាមបណ្ដោយផ្លូវបេតុង ក្នុង OCIC សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

បើតាមប្រភពពីប្រជាពលរដ្ឋនៅកន្លែងកើតហេតុបានឲ្យដឹងថា មុនកើតហេតុគេឃើញមានផ្សែងខ្មៅខ្មួលខ្មាញ់ហុយចេញពីក្នុងឃ្លាំង លុះមួយសន្ទុះក្រោយមក អណ្ដាតភ្លើងបានឆាបឆេះយ៉ាងសន្ធោសន្ធៅកាន់តែខ្លាំងឡើងៗ ធ្វើឲ្យប្រជាពលរដ្ឋពិបាកជួយក្នុងការពន្លត់។

ប្រភពដដែលបន្តទៀតថា ខណៈកំពុងតែមានផ្សែងហុយ ក៏មានឮសំឡេងផ្ទុះជាច្រើនដងដែរ ទើបបង្កើតឲ្យមានជាអណ្ដាតភ្លើងលេបឆក់យកឃ្លាំងស្តុកកង់នេះតែម្ដង។ ទើបភ្លាមៗ ក៏ប្រញាប់រាយការណ៍ជូនសមត្ថកិច្ចមូលដ្ឋាន ដើម្បីបន្តទាក់ទងទៅសមត្ថកិច្ចជំនាញអគ្គិភ័យមកជួយអន្តរាគមន៍បាញ់ពន្លត់។

ក្នុងរង្វង់ប្រតិបត្តិការពន្លត់នេះដែរ អគ្គិភ័យបានឆាបឆេះនូវឃ្លាំងស្តុកកង់ចំនួនជិត ៤ ០០០ គ្រឿង ខូចខាតទាំងស្រុង និងបានប្រើប្រាស់រថយន្តពន្លត់អគ្គិភ័យអស់ចំនួន ២៦ គ្រឿង ក្នុងនោះមានរថយន្តអគ្គិភ័យរបស់ស្នងការរាជធានីភ្នំពេញ , រថយន្តពន្លត់ OCIC , រថយន្តរបស់ទីក្រុងកោះពេជ្រ , រថយន្តជំនួយស្រាបៀកម្ពុជា , រថយន្តទីក្រុង អូឡាំព្យា , រថយន្តទីក្រុងរណបជ្រោយចង្វារ បាញ់ពន្លត់រហូតមកដល់វេលាម៉ោង ០៧ និង ៣៥ នាទីយប់ ថ្ងៃដដែល ទើបរលត់ជាស្ថាពរ។ ចំពោះមូលហេតុសមត្ថកិច្ចបានដាក់ការសង្ស័យបណ្ដាលមកពីឆ្លងចរន្តអគ្គិសនី៕

អត្ថបទ ៖ រដ្ឋា