ផ្គររន្ទះបាញ់សម្លាប់ស្ត្រីវ័យ៣០ឆ្នាំម្នាក់ ខណៈកំពុងឃ្វាលគោតាមវាលស្រែ

ស្រ្តីវ័យ៣០ឆ្នាំម្នាក់ត្រូវរន្ទះបាញ់ស្លាប់ភ្លាមៗនៅលើភ្លឺស្រែ ខណៈកំពុងដើរឃ្វាលគោនៅកណ្ដាលវាលស្រែក្រោមដំណក់ទឹកភ្លៀង។ បើតាមការអះអាងពីសមត្ថកិច្ចនៅតំបន់នោះបានបញ្ជាក់ថា ហេតុការណ៍នៃគ្រោះធម្មជាតិនេះបានកើតឡើងកាលពីថ្ងៃទី១២ ខែតុលា ឆ្នាំ២០២៤ វេលាម៉ោង១និង២០នាទីរសៀល នៅចំណុចក្រុមទី៣ ភូមិមុខរាហ៍១ ឃុំមុខរាហ៍ ស្រុករុក្ខគិរី ខេត្តបាត់ដំបង។

តាមការលើកឡើងពីឪពុកម្ដាយរបស់ស្ត្រីរងគ្រោះបានបញ្ជាក់ថា នៅមុនពេលកើតហេតុ គឺកូនស្រីរបស់គាត់ឈ្មោះ ខេង ភេន ភេទស្រី អាយុ៣០ឆ្នាំ រស់នៅភូមិមុខរាហ៍១ ឃុំមុខរាហ៍ បានចេញទៅឃ្វាលគោនៅចំណុចកើតហេតុខាងលើ គាប់ជួនពេលនោះក៏ស្រាប់តែមានភ្លៀងធ្លាក់មួយមេយ៉ាងខ្លាំង ហើយស្នូររន្ទះក៏បានបាញ់លាន់ឮក៏ក្រើក ទីបំផុតទើបដឹងថាកូនស្រីរបស់ពួកគាត់ត្រូវរន្ទះបាញ់ស្លាប់នៅកណ្ដាលភ្លឺស្រែ។

ក្រោយដឹងហេតុកម្លាំងជំនាញផ្នែកកោសល្យវិច័យបានចុះទៅពិនិត្យសព និងតាមការបញ្ជាក់ពីក្រុមគ្រួសារនៃសព ទើបសមត្ថកិច្ចបានធ្វើកំណត់ហេតុប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ៖ សោ និយមរ័ត្ន