អាជ្ញាធរខណ្ឌកំបូល ដាក់គ្រឿងចក្រជួសជុលផ្លូវមួយខ្សែដើម្បីសម្រួលការធ្វើដំណើររបស់ពលរដ្ឋ និងសិស្សានុសិស្ស

ដោយមើលឃើញពីការលំបាកធ្វើដំណើររបស់ប្រជាពលរដ្ឋ ក៏ដូចជាសិស្សានុសិស្សទៅសាលារៀន នៅចំណុចជង្ហុកទឹកដក់ប្រវែងជាង៣០ម៉ែត្រ នៅថ្ងៃទី១៥ ខែតុលា ឆ្នាំ២០២៤ លោក ឃឹម ស៊ុន សូដា អភិបាលនៃគណ៉អភិបាលខណ្ឌកំបូល បានចាត់អោយមន្ត្រីសហការជាមួយចៅសង្កាត់កំបូល ចាក់ដី ថ្ម និងដាក់គ្រឿងចក្រឈូសឆាយ បង្ហាប់អោយស្មើរស្អាត ដើម្បីបង្កភាពងាយស្រួលដល់ការធ្វើដំណើរ។

លោកអភិបាលខណ្ឌបានប្រាប់ កម្ពុជាថ្មី នៅរសៀលថ្ងៃទី១៥តុលា ថា ចំណុចទឹកដក់ជ្រៅនេះ ស្ថិតក្នុងភូមិតាកេរ្តិ៍ សង្កាត់កំបូល ខណ្ឌកំបូល រាជធានីភ្នំពេញ (ផ្លូវក្រោយសាលាបឋមសិស្សាកំបូល)។ លោកអភិបាលខណ្ឌបានបញ្ជាក់ថា ចំណុចខាងលើជាផ្លូវវាងជាមួយផ្លូវបេតុងបន្ទាយទាហ៊ានឆ័ត្រយោង៩១១ ឆ្លងកាត់ពីភូមិតាកេរ្តិ៍ ទៅភូមិតាសេក ហើយនៅពេលមានភ្លៀងធ្លាក់ផ្លូវនោះតែងតែមានទឹកដក់បង្កជាជង្ហក់។ ដោយមើលឃើញបែបនេះលោកក៏បានចាត់អោយមន្ត្រីសាលាខណ្ឌ សហការជាមួយចៅសង្កាត់កំបូល ចាក់ដីបំពេញ ឈូសឆាយកិនបង្ហាប់ ដោយគ្រឿងចក្រ
កិនដីនេះ បានមកពីការចូលរួមពីលោកមេបញ្ជាការកងពលឆ័ត្រយោង៩១១។

លោកអភិបាលខណ្ឌ បានប្រាប់អោយដឹងទៀតថា ចំណុចផ្លូវលើ នៅពេលផុលរដូវវស្សា លោកនឹងគ្រោងស្ថាបនាដោយមានប្រព័ន្ធលូដើម្បីរំដោះទឹកលិចផងដែរ៕

អត្ថបទ៖ សំណាង