នគរបាលស្រុកសង្កែ ចុះបង្រ្កាបបទល្មើសនេសាទខុសច្បាប់ក្នុងភូមិសាស្រ្ត

ស្បៃមង និងណរ៉ាវ រាប់ពាន់ម៉ែត្រ ដែលជាបទល្មើសនេសាទខុសច្បាប់ ត្រូវបានកម្លាំងអធិការដ្ឋាននគរបាលស្រុកសង្កែ សហការជាមួយកម្លាំងជំនាញ ចុះបង្ក្រាបជាបន្តបន្ទាប់ បើទោះបីជាបទល្មើសនៅតែកើតមានឡើងក៏ដោយ។

កិច្ចប្រតិបត្តិការដោយកម្លាំងចម្រុះ មានកម្លាំងជលផល កម្លាំងនគរបាល និងកម្លាំងសហគមន៍ បានធ្វើឡើងកាលពីថ្ងៃទី ២២ ខែតុលា ឆ្នាំ២០២៤ ក្រោមការដឹកនាំរបស់លោក គ្រឿន រដ្ឋា អភិបាលរងស្រុក តំណាងលោក នាង ច័ន្ទថារ៉ា អភិបាលនៃគណ:អភិបាលស្រុកសង្កែ និងជាប្រធានគណៈបញ្ជាការឯកភាពរដ្ឋបាលស្រុកសង្កែ និងលោកវរសេនីយ៍ទោ យុត តុងហូ អធិការនគរបាលស្រុកសង្កែ បាននាំកម្លាំងចុះបង្ក្រាបបទល្មើសនេសាទខុសច្បាប់នៅក្នុងភូមិសាស្ត្រឃុំតាប៉ុន ស្រុកសង្កែ ខេត្តបាត់ដំបង។

គួរបញ្ជាក់ដែរថា បច្ចុប្បន្ននៅលើផ្ទៃទឹកបឹងទន្លេសាប បទល្មើសនេសាទនៅតែកើតមានឡើងជាបន្តបន្ទាប់ បើទោះបីជាកម្លាំងជំនាញ កម្លាំងសហគមន៍ និងសមត្ថកិច្ចរួមគ្នាធ្វើការបង្ក្រាបយ៉ាងណាក៏ដោយក៏បទល្មើសនៅតែបន្តកើតមាន។

ជាលទ្ធផលក្នុងកិច្ចប្រតិបត្តិការកម្លាំងចម្រុះបានធ្វើការកំទេច ឡុកសរុបចំនួន ១៤កន្លែង ស្បៃមង ណរ៉ាវ សរុបប្រវែង ១.៥០០ ម៉ែត្រ បង្គោលសរុប៦៥០ដើម និងលែងកូនត្រីចំរុះសរុបចំនួន១៥គីឡូក្រាម។ ក្នុងកិច្ចប្រតិបត្តិការនេះដែរ គឺបានប្រើប្រាស់កម្លាំងសរុប ២៨នាក់ ទូកស្មាច់ចំនួន ៨គ្រឿង។ ក្រុមការងារសម្រេចកាប់បំផ្លាញ និងដុតចោល វត្ថុតាងបទល្មើសទាំងអស់នៅនឹងកន្លែង៕

អត្ថប៖ សោ និយមរ័ត្ន