សន្តិសុខសង្គម

ឧកញ៉ា ហ៊ួត ជា ស្នើឲ្យម្ចាស់ពាក្យបណ្ដឹងមានងារជា អ្នកឧកញ៉ា ដកពាក្យបណ្ដឹងងាកមកចរចាគ្នាដោយសន្តិវិធី

បានផុស

៣ ខែ មុន

នៅ

ថ្ងៃព្រហស្បតិ៍ ២៤ តុលា ២០២៤

ដោយ

បន្ទាប់ពីរងពាក្យបណ្ដឹងពីអ្នកមានកំពូលមានងារជា អ្នកឧកញ៉ា រួចមក លោកឧកញ៉ា ហ៊ួត ជា អគ្គនាយកក្រុមហ៊ុនសំណង់ ហ៊ួត ជា គ្រុប បានស្នើឲ្យម្ចាស់ពាក្យបណ្ដឹងដកពាក្យបណ្ដឹងវិញ និងងាកមកចរចាគ្នាដោយសន្តិវិធីវិញ។ ការស្នើសុំឲ្យម្ចាស់ពាក្យបណ្ដឹងមានងារជា អ្នកឧកញ៉ា ដកពាក្យបណ្ដឹងនេះ គឺដោយសារលោកមានគ្រួសារ និងបុគ្គលិកច្រើន ដែលជាទំនួលខុសត្រូវជីវភាព។ តែទោះយ៉ាងណា លោកឧកញ៉ា ហ៊ួត ជា អះអាងថា លោកនឹងចូលបំភ្លឺតាមដីការកោះហៅរបស់តុលាការនៅពេលឆាប់ៗនេះ។ នេះបើតាមសំណេររបស់លោកឧកញ៉ា ហ៊ួត ជា នៅលើបណ្ដាញសង្គមហ្វេសប៊ុកផ្ទាល់ខ្លួន កាលពីថ្ងៃទី២៣តុលាម្សិលមិញនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសំណេរនៅលើទំព័រហ្វេសប៊ុក លោកឧកញ៉ា ហ៊ួត ជា ក៏សូមឲ្យថ្នាក់ដឹកនាំ ក៏ដូចជាមិត្តភក្ដិជួយដល់លោកផង ហើយក្នុងសំណេរនោះលោកឧកញ៉ាក៏បានបង្ហើបឈ្មោះម្ចាស់ពាក្យបណ្ដឹងមានងារជា អ្នកឧកញ៉ា ជាអក្សរកាត់ថា ស.ឬ ដែលធ្វើឲ្យមហាជននៅតែមិនដឹងថា ម្ចាស់ពាក្យបណ្ដឹងនោះជាអ្នកមានកំពូលមួយណា។

សូមរំលឹកថា កាលថ្ងៃទី២១ ខែតុលា ឆ្នាំ២០២៤ លោកឧកញ៉ា ហ៊ួត ជា អគ្គនាយកក្រុមហ៊ុនសំណង់ ហ៊ួត ជា គ្រុប បានបង្ហើបឱ្យដឹងថា អ្នកមានកំពូលម្នាក់មានងារជា «អ្នកឧកញ៉ា» ដែលជាម្ចាស់គម្រោងសាងសង់ដ៏ធំមួយនៅរាជធានីភ្នំពេញ បានទិញការ៉ូពីលោកជាច្រើនមិនទាន់សងប្រាក់គ្រប់ចំនួន ហើយបែរជាមកប្តឹងលោកថែមទៀត។

តាមការបកស្រាយលើទំព័រហ្វេសប៊ុក នាព្រលប់ថ្ងៃចន្ទ លោកឧកញ៉ា ហ៊ួត ជា បានឱ្យដឹងថា ក្នុងបទពិសោធន៍ជាអ្នករកស៊ីជាង ១៤ឆ្នាំមកនេះ និងមានសាខាធំៗជាង ៥០ទូទាំងប្រទេស លោកតែងតែប្រកាន់គោលការណ៍ស្មោះត្រង់ជានិច្ចជាមួយអតិថិជន។ ទោះយ៉ាងណា រយៈពេល១ឆ្នាំមកនេះ លោកបានជួបរឿងមួយ ដែលមានអ្នកឧកញ៉ាម្ចាស់គម្រោងធំមួយ នៅរាជធានីភ្នំពេញ បានទិញការ៉ូពីក្រុមហ៊ុនលោក ដោយផ្តល់សែកឱ្យ ៣០% ហើយលោកក៏បានតម្កល់សែកឱ្យវិញផងដែរ ព្រមទាំងមានកិច្ចសន្យាច្បាស់លាស់ថែមទៀត។

ទោះមានការស្នើសុំឲ្យដកពាក្យបណ្ដឹងពីសំណាក់ចុងបណ្ដឹងយ៉ាងណាក្ដី រហូតមកដល់ថ្ងៃទី២៤ ខែតុលា ឆ្នាំ២០២៤នេះ ភាគីម្ខាងទៀតដែលមានងារជា អ្នកឧកញ៉ា ជាម្ចាស់បណ្ដឹងប្ដឹងលោកកឧកញ៉ា ហ៊ួត ជា នៅមិនទាន់ចេញមកអះអាង ឬបង្ហាញអត្តសញ្ញាណនៅឡើយទេ៕

អត្ថបទ៖ សុខុម