រដ្ឋបាលខណ្ឌទួលគោក ចុះឈូសឆាយផ្ទះសង់រំលោភលើចំណីផ្លូវលេខ ២៨៣ ដើម្បីពង្រីកឲ្យធំជាងមុន

កំណាត់ផ្លូវលេខ​ ២៨៣ ដែលកន្លងទៅមានសភាពតូចចង្អៀត ដោយសារមានពលរដ្ឋសាងសង់លើចំណីផ្លូវ ពេលនេះត្រូវបានរដ្ឋបាលខណ្ឌទួលគោក ដាក់គ្រឿងចក្រឈូសឆាយដើម្បីពង្រីកផ្លូវអោយកាន់តែធំទូលាយ ងាយស្រួលដល់ពលរដ្ឋធ្វើដំណើរ និងជួយកាត់បន្ថយការកកស្ទះចរាចរណ៍។

ជាក់ស្តែងនៅរសៀលថ្ងៃទី២៤ ខែតុលា ឆ្នាំ២០២៤នេះ រដ្ឋបាលខណ្ឌទួលគោកបានចាប់ផ្តើមពង្រីកផ្លូវកក្អមដែលនៅតាមបណ្តោយផ្លូវ ២៨៣ ស្ថិតក្នុងសង្កាត់បឹងកក់ទី០១ ខណ្ឌទួលគោក រាជធានីភ្នំពេញ ។

លោកស្រី មុិក ម៉ាលីស ជាអ្នករស់នៅតំបន់ក្បែរនោះ បានសាទរចំពោះអាជ្ញាធរដែលបានគិតគូរពីសុខទុក្ខប្រជាពលរដ្ឋ លើការពង្រីកផ្លូវអោយមានកាន់តែធំជាងមុនកាត់បន្ថយការកកស្ទះចរាចរណ៍នៅតំបន់ចំណុចនេះ ដែលកន្លងមកតែងមាន លំហូរចរាចរណ៍មមាញឹកទាំងយប់ទាំងថ្ងៃ។

លោក ជា ពិសី អភិបាលខណ្ឌទួលគោកបានអោយដឹងថា លោកទើបតែបានចុះត្រួតពិនិត្យផ្លូវ២៨៣នេះម្តងទៀតរួចរាល់នៅមុននេះបន្តិច។ រីឯផ្ទះដែលសាងសង់លើចំណីផ្លូវនេះ គឺត្រូវបានរដ្ឋបាលខណ្ឌយកគ្រឿងចក្រមកកាយចេញជាស្ថាពរ។ លោកអភិបាលខណ្ឌបន្តថា ចំពោះផ្លូវនេះនឹងត្រូវពង្រីកស្ថាបនាឡើងវិញ ក្នុងទំហំទទឹងជិត១៧ម៉ែត្រ ចិញ្ចើមផ្លូវសងខាង៦ម៉ែត្រ។

គួរបញ្ជាក់ផងដែរថា កាលពីថ្ងៃទី១៦ ខែតុលា ឆ្នាំ២០២៤កន្លងទៅ ភ្នាក់ងារសារព័ត៌មាន កម្ពុជាថ្មី បានទំនាក់ទំនងទៅលោក វេដ ដារិទ្ធ ចៅសង្កាត់បឹងកក់ទី១ លោកបានបញ្ចាក់ថា ទាក់ទិននឹងសំណង់សងរំលោភលើចិញ្ចើមផ្លូវ ប្រជាពលរដ្ឋបានយល់ព្រមរុះរើដោយសន្តិវិធី ហើយម្ចាស់ផ្ទះសង់លើចិញ្ចើមផ្លូវ ក៏បានស្នើសុំទៅកាន់សាលារាជធានី សុំអាស្រ័យផលមួយរយៈរហូតមានការដោះស្រាយជូនពួកគាត់ ទើបពួកព្រមរុះរើចេញទាំងស្រុង៕

អត្ថបទ៖ រដ្ឋា