សន្តិសុខសង្គម

សង្ស័យឆ្លងចរន្តអគ្គិសនី អគ្គិភ័យឆាបឆេះផ្ទះវិឡាមួយកន្លែង នៅខណ្ឌឫស្សីកែវ

បានផុស

២ ខែ មុន

នៅ

ថ្ងៃព្រហស្បតិ៍ ២៤ តុលា ២០២៤

ដោយ

ផ្ទះវិឡាមួយកន្លែង ត្រូវបានអគ្គិភ័យឆាបឆេះយ៉ាងសន្ធោសន្ធៅ ផ្សែងហុយខ្មួលខ្មាញ់ បង្កឲ្យមានការភ្ញាក់ផ្អើលដល់រថយន្តពន្លត់ចេញអន្តរាគមន៍ភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង ១២ និង ១០ នាទីថ្ងៃត្រង់ ថ្ងៃទី ២៤ ខែតុលា ឆ្នាំ ២០២៤ នៅចំណុចវិឡាលេខ J.៤៥ ក្នុងបុរីវិឡាទួលសង្កែ ក្នុងភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។

តាមប្រភពព័ត៌មានបានឲ្យដឹងថា នៅមុនពេលកើតហេតុគេឃើញភ្លើងបានឆាបឆេះចេញពីវិឡាមួយកន្លែងខាងលើដែលម្ចាស់ចាក់សោទុកចោល មានផ្សែងហុយខ្មួលខ្មាញ់ បង្កឲ្យមានការភ្ញាក់ផ្អើលដល់ប្រជាពលរដ្ឋនៅក្បែរខាងទាក់ទងហៅរថយន្តពន្លត់អគ្គិភ័យទៅអន្តរាគមន៍បាញ់ពន្លត់។

បើតាមនគរបាលមូលដ្ឋានបានឲ្យដឹងថា នៅក្នុងហេតុការណ៍នេះ រថយន្តពន្លត់អគ្គិភ័យចំនួន ៥ គ្រឿង បានទៅអន្តរាគមន៍បាញ់ពន្លត់ ក្នុងនោះរថយន្តរបស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញចំនួន ៤ គ្រឿង និងរថយន្តរបស់សាលាខណ្ឌឫស្សីកែវចំនួន ១ គ្រឿង។

ដោយឡែកបើតាមការបញ្ជាក់ពីកម្លាំងសមត្ថកិច្ច បានឲ្យដឹងថា អគ្គិភ័យនេះបណ្ដាលឲ្យសម្ភារៈមួយចំនួននៅក្នុងផ្ទះវិឡាខាងលើបានរងការខូចខាត ហើយចំពោះមូលហេតុសង្ស័យឆ្លងចរន្តអគ្គិសនី៕

អត្ថបទ ៖ ម៉េង