អុជធូបសែនថ្ងៃសីល បង្កជាអគ្គិភ័យឆេះសម្ភារអស់មួយបន្ទប់

មានករណីអគ្គិភ័យមួយបានឆាបឆេះសម្ភារអស់មួយបន្ទប់ ខណៈម្ចាស់ផ្ទះអុជធូបនៅលើអាសនៈថ្ងៃសីល បង្កជា​អណ្តាតភ្លើង។ ហេតុការណ៍នេះ ភ្ញាក់ផ្អើលនៅវេលាម៉ោង៩និង៣០នាទី ព្រឹកថ្ងៃទី២៥ ខែតុលា ឆ្នាំ២០២៤ ស្ថិតផ្ទះល្វែងលេខ 01L ភូមិព្រះពន្លា សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។

តាមប្រភពពីម្ចាស់ផ្ទះឈ្មោះ ស្រី ពៅ អាយុ៣៦ឆ្នាំ មុខរបរលក់ខោអាវអនឡាញ បានប្រាប់អោយដឹងថា នៅពេលកើតហេតុ ដោយសារថ្ងៃនេះជាថ្ងៃសីលក្រុមគ្រួសារគាត់បានអុជទៀនធូបនៅលើអាសនៈក្នុងបន្ទប់ជាន់ឡៅតឿខាងក្រោយ រួចចេញទៅធ្វើការ និងមានអ្នកនៅផ្ទះ២ ទៅ៣ នាក់នៅធ្វើការជាន់ខាងក្រោម ដោយមិនបានចាប់អារម្មណ៍នោះទេ ស្រាប់នៅម៉ោងកើតហេតុ ធំក្លិនឈ្ងៀម ក៏ឡើងទៅមើលឃើញអណ្តាតភ្លើង ឆេះនៅលើអាសនៈតែម្តង ទើបឆោឡោរ ស្រែកអោយគេជួយ សុំកិច្ចអន្តរាគម៍ពីសមត្ថកិច្ច។

លោកវរសេនីយ៍ឯក ព្រហ្ម យ៉ន នាយការិយាល័យបង្ការ និងពន្លត់អគ្គីភ័យ នៃស្នការដ្ឋាននគរបាលរាជធានីភ្នំពេញ បានអោយដឹងថា បន្ទាប់ពីទទួលបានព័ត៌មានរាយការណ៍ពីប្រជាពលរដ្ឋ តាមរយៈគ្រុបតេឡេក្រាម លោកបានបញ្ជាកម្លាំងដែលប្រចាំការគោលដៅចេញរថយន្តពន្លត់អគ្គិភ័យភ្លាមៗផងដែរ។

សូមបញ្ជាក់ផងដែរថា ក្នុងករណីនេះ កម្លាំងសមត្ថកិច្ចបានប្រើប្រាស់រថយន្តបាញ់ទឹកអស់ចំនួន២រថយន្ត និងខូចខាតសម្ភារៈអស់មួយបន្ទប់ និងមិនរាលដាលបង្កអោយមនុស្សរងរបួសនោះទេ ហើយបានពន្លត់រលត់ទៅវិញនៅម៉ោង១០ព្រឹកថ្ងៃដដែល៕

អត្ថបទ៖ សំណាង