Update៖ ករណីឆេះរោងចក្រផលិតក្រដាសកាតុងនៅខណ្ឌពោធិ៍សែនជ័យយប់មិញសមត្ថកិច្ចប្រើរថយន្ដពន្លត់អគ្គិភ័យ២០៦គ្រឿង

ករណីអគ្គិភ័យឆេះរោងចក្រផលិតក្រដាសកាតុងនៅសង្កាត់ចោមចៅទី២ ខណ្ឌពោធិ៍សែនជ័យ កាលពីយប់រំលងអធ្រាត្រថ្ងៃ២៥តុលានេះ កម្លាំងសមត្ថកិច្ចបានអន្តរាគមន៍ប្រើប្រាស់រថយន្ដពន្លត់អគ្គិភ័យសរុប២០៦គ្រឿង និងបញ្ចប់ការអន្តរាគមន៍នៅម៉ោង១១ព្រឹកថ្ងៃដដែល។ បើតាមសមត្ថកិច្ច ករណីនេះ គឺផ្ដើមឡើងដោយសារការឆ្លងចរន្ដអគ្គិសនី។

សមត្ថកិច្ចបន្ថែមថា ទីតាំងរោងចក្រដែលអគ្គិភ័យឆាបឆេះនេះមានទំហំ ៤០ម៉ែត្រ គុណ ៨៦ម៉ែត្រ មានម្ចាស់ឈ្មោះ YU YUAN FENG  ភេទប្រុស អាយុ៤១ឆ្នាំ ជនជាតិចិន មុខរបរមេការ។

លោកវរសេនីយ៍ឯក ព្រហ្ម យ៉ន នាយការិយាល័យបង្ការ និងពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ បានអោយដឹងថា ចំពោះកិច្ចប្រតិបត្តិការណ៍បាញ់ពន្លត់គ្រោះអគ្គិភ័យកាលពីវេលាម៉ោង១២យប់ឈានចូលថ្ងៃទី២៥ ខែតុលា ឆ្នាំ២០២៤ កម្លាំងការិយាល័យបង្ការ និងពន្លត់អគ្គិភ័យ នៃស្នងការដ្ឋានរាជធានីភ្នំពេញ រួមជាមួយរថយន្តជំនួយកងពលតូចង៧០ រថយន្តស្រាបៀរកម្ពុជា បានមកជួយអន្តរាគមន៍បាញ់ពន្លត់ អោយរលត់ជាស្ថាពរ នៅវេលាម៉ោង ១១ព្រឹកថ្ងៃខែឆ្នាំដដែល។ ក្នុងនោះប្រើប្រាស់ទឹកអស់សរុបចំនួន ២០៦ឡាន ស្មើនឹង ៨២៨ម៉ែត្រគូប។

លោកនាយការិយាល័យបន្តទៀត រោងចក្រដែលឆេះនោះ គឺជាប្រភេទសំណង់ដែកប្រក់សង្ក័សី ទំហំ៤០ម៉ែត្រ គុណ ៨៦ម៉ែត្រ ហើយបង្កអោយមានការខូចខាតសម្ភារឆេះអស់ទាំងស្រុង និងបានឆេះរាលដាលដល់រោងចក្រកាត់ដេរទំហំ ( ៤០ម៉ែត្រ គុណ ៨៦ម៉ែត្រ) ខូចខាតអស់ប្រហែល ៤០ភាគរយ និងសម្ភារខូចខាតអស់៧០ភាគរយ។

លោកវរសេនីយ៍ឯក ព្រហ្ម យ៉ន បញ្ជាក់ថា ដោយសារតែរោងចក្រដែលឆាបឆេះនេះ សម្បូរទៅដោយប្រភេទក្រដាសកាតុង ហើយការវិវត្តន៍ឆាបឆេះគឺរហ័សខ្លាំង និងចំហេះនៃក្រដាសកាតុងនេះមានសភាពក្តៅងុំ ទើបកម្លាំងអគ្គិភ័យ បានព្យាយាមអស់ពីកម្លាំងកាយចិត្ត ប្រើរយៈពេល១១ម៉ោង ក្នុងការបាញ់ពន្លត់អោយរលត់ ដើម្បីបង្ការកុំអោយមានអណ្តាតភ្លើងឆាបឆេះឡើងវិញ៕

អត្ថបទ៖ រដ្ឋា