សន្តិសុខសង្គម

ឆ្លងចរន្តអគ្គិសនីឆេះខ្សែភ្លើងលើបង្គោល ៣ ទីតាំងផ្សេងគ្នា ក្នុងខណ្ឌបឹងកេងកង

បានផុស

៥ ខែ មុន

នៅ

ថ្ងៃចន្ទ ២៨ តុលា ២០២៤

ដោយ

បង្គោលភ្លើងចំនួន ៣ ទីតាំងផ្សេងគ្នា ក្នុងខណ្ឌបឹងកេងកង ត្រូវបានឆ្លងចរន្តឆេះចេញជាផ្កាភ្លើងយ៉ាងសន្ធោសន្ធៅ ផ្អើលប្រជាពលរដ្ឋ និងក្រុមរថយន្តពន្លត់អគ្គិភ័យអន្តរាគមន៍បាញ់ពន្លត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ១២ និង ០៥ នាទី រំលងអធ្រាត្រ ឈានចូលថ្ងៃទី ២៨ ខែតុលា ឆ្នាំ ២០២៤ ស្ថិតតាមបណ្ដោយផ្លូវ ៩៥ និងផ្លូវលូ ១០៥ ស្ថិតក្នុងមូលដ្ឋានសង្កាត់បឹងកេងកងទី ២ ខណ្ឌបឹងកេងកង រាជធានីភ្នំពេញ។

តាមប្រភពពីប្រជាពលរដ្ឋរស់នៅកន្លែងកើតហេតុបានឱ្យដឹងថា មុនពេលកើតហេតុ ដោយមានភ្លៀងធ្លាក់មួយមេស្របពេលដែលមេឃរលឹមស្រិចៗ ក៏ស្រាប់តែឮសូរសំឡេងផ្ទុះ ហើយពួកគាត់ចេញមកមើល ក៏ឃើញបង្គោលទល់មុខប៉ុស្តិ៍នគរបាលបឹងកេងកង ២ នៅផ្លូវ ៩៥ ឆាបឆេះចេញជាផ្កាភ្លើងសន្ធោសន្ធៅចំនួន ២ កន្លែងជាប់គ្នា។ ពេលនោះដែរ ឃើញស្ថានភាពបែបនេះ ប្រជាពលរដ្ឋក៏បាននាំគ្នាអន្តរាគមន៍យកបំពង់ពន្លត់អគ្គិភ័យបាញ់ពន្លត់ ក៏ស្រាប់តែមាន ១ ករណីទៀត ទុស្សេឆាបឆេះខ្លាំងដូចគ្នា គឺនៅចំណុចផ្លូវលូ ១០៥ ជិតនឹងវិទ្យាល័យយុគន្ធរ ក្នុងមូលដ្ឋានបឹងកេងកង ២ ដូចគ្នាទើបពួកគាត់រាយការណ៍ជូនទៅខាងកម្លាំងសមត្ថកិច្ចចេញរថយន្តអន្តរាគមន៍របស់ការិយាល័យបង្ការ និងពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញចេញចំនួន ២ គ្រឿង ដោយមួយគ្រឿងមកធ្វើការបាញ់ពន្លត់នៅផ្លូវ ៩៥ និងមួយគ្រឿងទៀតបាញ់ពន្លត់នៅផ្លូវលូ ១០៥ រហូតដល់ម៉ោង ១២ និង ៣០ ថ្ងៃដដែល ទើបភ្លើងរលត់ទៅវិញជាស្ថាពរផងដែរ។

ដោយឡែកសមត្ថកិច្ចបានឱ្យដឹងថា ហេតុការណ៍អគ្គិភ័យខាងលើនេះ មិនបង្កឱ្យមានការរីករាលដាលដល់ផ្ទះសម្បែងរបស់ប្រជាពលរដ្ឋ ឬក៏មានមនុស្សគ្រោះថ្នាក់នោះទេ គ្រាន់តែខូចខាតខ្សែភ្លើង ខ្សែអុបទិក និងប្រអប់ភ្លើងអស់មួយចំនួនធំតែប៉ុណ្ណោះ៕

អត្ថបទ ៖ សុខា