Update៖ ករណីឆេះនៅសង្កាត់ស្ទឹងមានជ័យ​ទី២ គឺឆេះឃ្លាំងស្តុកសាច់បង្កក

ឃ្លាំងស្តុកសាច់បង្កកមួយកន្លែងសង្ស័យឆ្លងចរន្តអគ្គិសនីបណ្ដាលឲ្យឆាប់ឆេះយ៉ាងសន្ធោសន្ធៅខូចខាតទូរក្លាសេនៅខាងក្នុង និងម៉ូតូចំនួនមួយគ្រឿងសំណាងល្អគ្មានអ្នកជាប់ទាំងនៅខាងក្នុង។

ករណីអគ្គិភ័យនេះបង្កភ្ញាក់ផ្អើលកាលពីវេលាម៉ោង១០និង១០នាទីព្រឹកថ្ងៃទី២៨ ខែតុលា ឆ្នាំ២០២៤ នៅចំណុចផ្ទះមួយកន្លែងនៅតាមបណ្តោយផ្លូវ 77BT ភូមិដំណាក់ធំ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ។ ម្ចាស់ទីតាំងមានឈ្មោះ ស៊ីម ម៉េងក្រុង ភេទប្រុស អាយុ៤៤ឆ្នាំ ជនជាតិខ្មែរ មុខរបរស្តុក និងចែកចាយសាច់។

ប្រភពពីអ្នកនៅខាងក្នុងផ្ទះបានប្រាប់អោយដឹងថា មុនកើតហេតុគេឮសម្លេងផ្ទុះចេញពីខាងក្រោយឃ្លាំង ដែលនៅជាប់ផ្ទះ ស្របពេលឮដូច្នោះ គាត់បានរត់ទៅក្នុងឃ្លាំងមើល ក៏បានឃើញមានផ្សែងលាយលំអណ្តាតភ្លើង ភ្លាមៗគាត់បានរត់ទៅយកបំពង់ពន្លត់អគ្គិភ័យមកបាញ់ពន្លត់ តែពេលរត់ត្រឡប់មកវិញឃើញថាឆាបឆេះកាន់តែខ្លាំងទៅ។ កំឡុងពេលនោះគាត់បានព្យាយាមយកបំពង់បាញ់ពន្លត់ប៉ុន្តែដោយសារមានផ្សែងច្រើន លាយលំអណ្តាតភ្លើងឆាបឆេះសន្ធោសន្ធៅទៅហើយ ទើបរាយការណ៍ជូនសមត្ថកិច្ចជំនាញអគ្គិភ័យ ដើម្បីមកជួយអន្តរាគមន៍អោយទាន់ពេលវេលាជៀសវាងបង្កការរាលដាល។

បើតាមសមត្ថកិច្ចគ្រោះអគ្គិភ័យនេះបានឆាបឆេះឃ្លាំងដែកប្រក់ស័ង្កសី ទំហំ ០៤ម៉ែត្រ x ១៥ម៉ែត្រស្ទើរទាំងស្រុង និងខូចខាតម៉ូតូមួយគ្រឿង និងសម្ភារៈមួយចំនួនផងដែរ និងបានប្រើប្រាស់រថយន្តពន្លត់របស់ស្នងការរាជធានីចំនួន ១០គ្រឿង រួមជាមួយរថយន្តជំនួយរបស់កងរាជធាវុធហត្ថ ០២ គ្រឿង និងរថយន្តស្រាបៀរកម្ពុជា១គ្រឿង បាញ់រហូតអោយរលត់ជាស្ថាពរ។ ចំពោះមូលហេតុ សមត្ថកិច្ចបានសង្ស័យថា អាចបណ្តាលមកពីឆ្លងចរន្តអគ្គិសនី៕

អត្ថបទ៖ ម៉េង