ឃាត់ខ្លួនជនសង្ស័យ ១០ នាក់ ពាក់ព័ន្ធការប្រើប្រាស់គ្រឿងញៀន នៅខណ្ឌពោធិ៍សែនជ័យ

កម្លាំង​មន្ទីរ​ប្រឆាំង​គ្រឿងញៀន សហការ​ជាមួយ​កម្លាំង​នគរបាល​ខណ្ឌ​ពោធិ៍​សែន​ជ័យ ចុះ​រដ្ឋបាល​បង្ក្រាប​ឃាត់ខ្លួន​ជនសង្ស័យ​ចំនួន ១០ នាក់ ក្នុង​នោះ ស្រី​ម្នាក់ ពាក់ព័ន្ធ​ការ​ប្រើប្រាស់​គ្រឿងញៀន។

ប្រតិបត្តិការ​ខាង​លើ​នេះ​បាន​ធ្វើ​ឡើង​កាលពី​ព្រឹក​ថ្ងៃ​ទី ៣០ ខែ​តុលា ឆ្នាំ ២០២៤ នៅ​ក្រោយ​សាលា​បឋម​សិក្សា ហ៊ុន សែន ជម្ពូវ័ន ភូមិ​ជម្ពូ​វ័ន ០១ សង្កាត់​ចោមចៅ​ទី ០៣ ខណ្ឌ​ពោធិ៍​សែន​ជ័យ។

សមត្ថកិច្ច​បាន​ឱ្យ​ដឹង​ថា ក្រោយពី​ទទួល​បាន​ព័ត៌មាន​ពី​ប្រជាពលរដ្ឋ​សម្ងាត់​ថា ទីតាំង​ខាង​លើ​មាន​ការ​ជួញដូរ និង​ប្រើប្រាស់​ថ្នាំញៀន ទើប​កម្លាំង​មន្ទីរ​ប្រឆាំង​គ្រឿងញៀន​បាន​សហការ​ជាមួយ​កម្លាំង​នគរបាល​ខណ្ឌ​ពោធិ៍​សែន​ជ័យ​ចុះ​រដ្ឋបាល​បង្ក្រាប​ភ្លាមៗ។

ក្នុង​រង្វង់​ប្រតិបត្តិការ​ខាង​លើ​នេះ​ដែរ កម្លាំង​សមត្ថកិច្ច​ឃាត់ខ្លួន​ជនសង្ស័យ​ចំនួន ១០ នាក់ ស្រី​ម្នាក់ រួម​ទាំង​សម្ភារៈ​ប្រើប្រាស់​ថ្នាំញៀន​មួយ​ចំនួន។

បច្ចុប្បន្ន​ជនសង្ស័យ​ត្រូវ​បាន​នាំ​ខ្លួន​មក​ប៉ុស្តិ៍​នគរបាល​រដ្ឋបាល​ចោមចៅ​ទី ០៣ ដើម្បី​ចាត់ការ​តាម​នីតិវិធី៕

អត្ថបទ ៖ សុខា